Pynshai ne ngin nym shah siew bai ding, ong ka KSU ia ka MeECL

Shillong, 7 Lber:
Ka Khasi Student Union (KSU) Central Body ka la ujor sha u Chairman Cum Managing Dierctor Meghalaya Energy Corporation Limited,MeECL bad kumjuh ruh sha u Director ka Corporate Affair katei ka tnad halor ka jingkiew palat ka bording kaba ki paidbah ki la ud bad shem jingeh ban siew. Ka KSU ha ka jingthoh kaba la phah sha katei ka tnad ka la bthah ba ka tnad ka dei ban pynbeit noh ia baroh ki jingbakla bad leh mardor ia kane ka kam, lym kumta ka seng kam banse ban bthah ia ki paidbah ba kin ym siew ia ka bai bording kat bym pat lah ban pynbiang.
Halor katei ka jing kiew palat ka bording ka seng ka la iathuh ba ka la ioh bun ki jingujor na ki paidbah bad ka la leit ruh ban jurip ha kylleng ki jaka bad ka shem ba katei ka jingkiew ka bording kam dei tang ha ki katto katne jaka hynrei ka la long jan ha baroh kawei ka jylla, kumta dei hadien ba la jurip bha ka sa phah ka jingujor sha ki heh katei ka tnad ban shim khia noh mardor ia katei ka kam. Ha ka shithi kaba ka seng ka la phah la soi da u bah Daniel Khyriem President bad u bah Auguster Jyrwa General Secretary KSU.
Ha kawei pat ka khubor, ka shnong Mawkhar ka la phah da ka jingthoh sha u Assistant Executive Engineer ka Meghlaya Electricict Corporation Ltd (MeECL), Shillong Distribution halor ka jingkiew palat ka bait hang ding, kaba long haduh laishah na ka ba ju poi manla u bnai. Ka kyrwoh na u Rangbah shnong ka Mawkhar u bah WHD Syngkon u la ong ba ki paidbah nongshong shnong ki kyndit ban iohi ba ka bait hang ding, jong u bnai rymphang ka la kiew shaba palat kaba long laishah na kaba ju poi manla u bnai. Ki paidbah ki la pynpaw ka jinglyngngoh namarba kim shym la don karkhana kaba ki pyniaid bad nalor baa k don ka jingtyngkai bording ka sorkar (load shedding) ka bai bording pat ka nangkiew. “Ngim shym la don karkhana kaba rit ne kaba heh” ong ka shithi u Rangbah shnong sha ka MeECL uba la bthah ba kin peit bad jurip bha ioh ba lehse ka lah ban don ka jingbakla haba khein ia ki bill light ne kiwei pat ki jingbakla kiba ka tnad ka tip kham bha. Lah ban kdew ba u bah Syngkon u la ai kopi ia katei ka jingthoh sha u Myntri ka tnad bording ka jylla u Clement Marak, sha ka MLA ka Mawkhar ka kng Roshan Warjri kaba long ruh ha ka juh ka por ka Myntri ka kam pohing , bad sha u Deputy General Manager, DGM Distribution MeECL.