Thaw ka sorkar ia ki lad, ban pynbun bording, ong u Lat

Shillong, 7 Lber:
Ha kane ka jylla kaba la hiran bording khait kaba la pynmih ia ka jingthnum kaba jur na ki paidbah pyrshah ia ka MeCEL, u Lat ka jylla u KK Paul u la ong ba ka sorkar ka la thaw ia ki lad ki lynti ban pynkhlain ia ka jingpynmih bording.
Haba kren hynne ka sngi ba sdang ka dorbar jong ka jylla, u Lat u laong ba ka jinghiran bording ka long haduh 20-30 percent ha kane ka jylla.
U la ong ba ka jingsurbe ia ka 280 MW Kynshi Hyrdro Electric Project bad ka 90 MW Mawphu Project ka dang iaid shakhmar haduh mynta ban pynkhreh ia ka detailed project reports (DPRs) ban sa pyndep shen.
“Ka sorkar ka la shim ia ki lad ki lynti ban pyntreikam shaid shaid ia ka 240 MW Thermal Power Project ha Garo Hills lyngba ka IPP mode.
U la ong ruh ba ka Loop In Loop Out (LILO) ka Pallatana – Bongaigaon Transmission ha Byrnihat la dep bad ka lain ha Killing Sub Station la pyntreikam ha u Lber mynshem snem ha kaba ka jylla ka la ioh bhah 79 MW na ka Pallatana Project. “Ka Agia-Nangalbibra Transmission la dep ban ai bording sha Garo Hills bad ka jingpynmih bording ka la kham bun”, u la ong.
U Paul u la ong ruh ba ka jingpynbun ia ka jingpynmih bording ka sub-station ha Umiam, Mendipathar, Rongkhon bad ha Jowai la pynrung ha kane ka mang tyngka jong mynta u snem.
U la ong ba kumba khadhynriew tylli ki jingsam bording la bei pisa na ka World Bank ha kane ka mang tyngka ban sa wan. Na ka Restructured Accelerated Power Development and Reforms Programme (R-APDR), ka jingtrei ka la iaid shaid shaid ha ki khyndai tylli ki nongbah ha ka jinglut kaba la kot sha ka T. 33.97 klur.