Shillong: Ka MDC jong ka Mylliem konstitwensi kaba dei ruh ka Deputy Chief Executive Member ( y.CEM) ka KHADC ka kong Teilinia Thangkhiew ka la pyniasoh ialade sha ka seng PDF ha ka jingialang kaba la long ha ka sngi saitjaiñ, ha Mylliem Madan ïng Syiem.
La pdiang sngewbha ia ka kong Teilinia sha ka seng PDF da ki nongialam ba hakhmat jong katei ka seng kiba kynthup ia u bah Hamlet Dohling MLA ka Mylliem uba dei ruh u Working President jong ka PDF ha kajuh ka por uba dei ruh u myntri pynroi sor jong ka sorkar jylla, la donlang ruh sa u bah Banteidor Lyngdoh u myntri kam rep jong ka sorkar jylla uba dei ruh u Working President jong katei ka seng, u bah Auspicious Lyngdoh Mawphlang General Secretary katei ka seng, u bah Morningstar Mawsor MDC ka Mawshynrut bad u bah Hadrian Lyngdoh MDC ka Mawkyrwat bad kiwei pat ki nongialam jong katei ka seng.
Haba kren ha katei ka jingialang, ka kong Teilinia ka la ong ba ka dawbah ba ka la leit ban ia soh sha ka seng PDF bad ban ia khun na katei ka seng ha kane ka elekshon MDC 2019 ka dei namarba ka la iohi ia ki kam kiba u MLA ba mynta u bah Hamlet u trei, “Mynshuwa nga ia khun pyrshah bad u MLA hynrei mynta haba nga iohi ia ki kam jong u, nga pyndem ialade ban ai ka jingiatreilang, u la leh kumba u la kular ha ka por elekshon ia ka aiñ MUDA, ka jingiatreilang jong nga bad u MLA ka dei na ka bynta ka jingbha ki paidbah” ka la ong.
Ka la iathuh ba shuwa ba kan rung hapoh ka seng PDF, ka jingiakren ka la iaid da ki bnai haduh ba kan da shim ia ka rai rangbah. Ka la ong ruh ba ka ju don ka jingkren ba ka jaitbynriew Khasi kam ia tylli bad mynta ka la ong ba ka Mylliem konstitwensi kan dei ka nuksa ban pyni ia ka jingiatylli. Ka la iathuh ba ki paidbah ki la pynpaw ka jingsngewtynnad ban iohi ba u MLA bad ka MDC ki ia treilang bad ka la ong ruh ba ki nongkyrshan jong ka kiba don mynshuwa ha ka HSPDP mynta ki la wan lang bad ka ban ia soh sha ka PDF.
Katba u bah Hamlet pat u la ong ba kane ka dei ka sien kaba nyngkong eh ha Mylliem konstitwensi ba u MLA un ia treilang bad ka MDC, “Ka dei ka sien kaba nyngkong eh ha Mylliem konstitwensi ba u MLA un ia treilang bad ka MDC ,lada ngim ia treilang kum ki nongmihkhmat ki paidbah kin shem jynjar” u la ong. U la iathuh ba ka rai ban ai tiket sha ka kong Teilinia kam dei satia ka rai jong u shimet hynrei ka dei ka rai jong kiba bun balang hapoh ka Party PDF bad u la ong ba hadien ba u la dep ban ia kren sani bha hapoh ka Party ban ai tiket ia ka kong Teilinia ki nongtrei Party kiba kwah ban ia leh elekshon MDC ki la kynran dien ban ailad ia ka kong Teilinia ba ka Party PDF kan ioh jingjop.