Ki paidbah ka Nongpoh ki la kwah ia ka jingkylla:Rona Khymdeit

Shillong, 03 Lber:
Ka MDC ka Nong poh Konstiwensi ka Kong Rona Khymdeit (UDP) ka la ong ba ki paidbah ka Nongpoh ki la kwah ia ka jingkylla hapoh kane ka Konstiwensi bad dei na kane ka daw ba ki paidbah ki la pynjop donburom ia ka ha kane ka kynti.
“Ka jingjop jong nga ka long namar ba ki paid bah khamtam ki samla ki bun kiba la nang la stad ki kwah ba ka don ka jingkylla hapoh kane ka Konstiwensi, bad ka dei ka mon jong u paidbah ba ki rai ban pynjop ia nga”, la ong ka Kong Rona haba iakren bad u Rupang hynne ka sngi.
Ka la ong ba watla ka la shah rem myn shemsnem ha ka elekshon MLA hynrei ka khlem kynran dien.
“Nga burom ia ka rai jong ki paidbah watla nga rem haba nga iakhun ia ka elekshon MLA”, la ong ka kong Rona.
Ka Kong Rona kaba jop na UDP, ka la thaw rekod kum ka longkmie ban shah jied na Ri-Bhoi sha ka KHADC.
Ka la ong ba ka UDP ka don jingkyrmen nang ne shakhmat watla ha kane ka elekshon MLA ka la shah pynjah kyrteng ha Ri Bhoi District hynrei hadien ba la jop arngut ki kyrtong ha ka MDC kynthup na Nong poh bad na Umsning nangne shakhmat kane ka Party ka don jingkyrmen ha ka elekshon ka ban wan ha u snem 2018. Kane ka jingjop jong ks UDP na kine ki ar tylli ki jaka ka long kumba bet symbai.
Haba kylli halor ka elekshon MLA 2018 la kan iakhun biang pyrshah ia u Bah DD Lapang, ka la ong ba ia kane kam pat lah ban ong hynrei ka shong ha ka sur ki paidbah da ki ibit ia ka rukom treikam jong ka ha kine ki 5 snem mynta.
“Lada ki paidbah ki kwah ngan mih ban iakhun ha u 2018”, la ong ka Kong Rona bad ka la bynrap ba katkum ka jingshah rem jong ka ha ka MLA elekshon ka kham duna ban ia ka jingtam jong ka ha kane ka MDC elekshon..
Shuh shuh ka la ong haba iadei ba ka roi ka par jong kane ka Konstiwensi ba la mihkhmat da u Bah Lapang da ki 30 snem mynshwa u ba la long ruh u Myntri Rangbah ka jylla haduh mynta kane ka Konstiwensi kam pat da roi than.
“Hoid u Bah Lapang u dei u nongialam ba tbit hynrei haba phai pat ha ka liang ka roi ka par kam pat da roi than dang don bun ki jingduna”, la ong ka MDC ka Nongpoh.