Shah kem u heh pulit thok

Shillong,3 Lber:
Hadien ba la ioh jingtip kaba thikna ba la don uwei u briew uba la leh mynleh ia lade kum u heh pulit uba bat ia ka kyrdan IPS officer , ki pulit ka jylla ki la buddien ia ka iaid ka ieng utei u briew la kumba katto katne por bad hadien ba la ioh ka jingtip kaba biang ia ka jaka sah jaka shong jong u, mynta ka janmiet ha ka por 5 baje eiei ki pulit ka nongbah Shillong ki la leit ban khynra ha ing sah jong u kaba don ha Veronica Lane Laitumkhrah. Utei u briew u dei uba la tip kyrteng kum u Sabyasachi Pal Chowdhury.
Ha katei ka jingleit khynra ki pulit ki la ioh ban kurup shibun bah ki tiar kiba la ju pyndonkam da ki heh pulit ophisar, kynthup ia ka jain phong pulit (uniform) kaba ju phong da ki heh pulit kiba bat ia ka kyrdan kum u IGP, la ioh kurup ruh ki ID Card, ki pisa. Shuh shuh kaba kham sngew phylla ka long ba na ing sah utei u briew u ba leh mynleh ialade kum u heh pulit ki pulit ki la ioh ruh ban kurup ia ka kali kaba don ia ka lama kaba ju wah nki heh pulit ha ki kali jong ki bad katei ka kali ka dei kaba don ia ka kali light saw.
Haduh mynta u SP ka East Khasi Hills u bah M Kharkrang u la iathuh ba ki pulit ki dang bteng ia ka jingkhynra na ka ing sah u Chowdhury bad ka jingkurup ia ki tiar ki tar ka dang iai bteng.