Ba khyllem 2 ngut ki radbah, suba ka UDP ba trei ka pisa Congress

Shillong,3 Lber:
Ka jingkhyllem noh ki 2 ngut ki MLA ka UDP ha kane ka elekshon MDC ba la dep ka la pynlyng ngoh bad pynkyndit thret ia ka jylla baroh kawei. Lah ban ong ba u bah Remingtone Pyngrope u MLA ka UDP na Maw kynrew uba long ruh u Deputy CEM ha kine ki san snem kiba la dep bad u bah Titos W Chyne u MLA ka Sohra uba long ruh ha ka juh ka por u MDC barim ki dei ki 2 ngut ki radbah ka UDP, kiba la khyllem noh ha kane ka elekshon MDC ba dang shu dep. Ha kawei pat ka liang ka long ruh ka kam ba radbah bad ka kam ba phylla tam ia ka seng Congress kaba la lah ban trei borbah haduh ba kan da lah ban pynkhyllem kat ia kitei ki 2 ngut ki radbah kiba lehse ma ki ruh kim shym la phohsniew eiei ba kin ioh mad ia ka nam rem.
Ban twad jingmut ia ka daw jong ka jingshah rem jong ki u Rupang u la ioh ban ia kren bad u bah Titos W Chyne u MLA ka Sohra uba la shah pynliem ha u kyrtong ka Congress na Sohra u bah Donevan Kharwanlang. Haba ia kren bad u bah Titos W Chyne la sngewthuh shai ba na ka liang jong u ruh u don ha ka umdum halor ka jingshah rem kaba um shym la khmih lynti eiei ba un shah rem, hynrei ha ka jingiakren la sngewthuh shai ba u bah Titos u la suba ba ka daw bah jong ka jingshah rem jong u ka dei ka jingtrei borbah ka pisa Congress ha Sohra khyndiat sngi shuwa ka sngi thep vote. Khlem da kynnoh tang ia kiwei , u Bah Titos Chyne u la kdew ruh ba nalor ka jingtrei borbah ka pisa, ka jingleh sting bad ka jingkhein sting jong u ruh ka lah ban dei kawei na ki dawbah ba ka Congress ka la ioh ban shim kabu ha kane ka elekshon ba dang shu dep, ym lah ban sngewthuh ia kita ki jingkhein sting ka lah ban dei ka jingkhein sting ban tur sha ki paidbah ne ka jingkhein sting ban leit ialap sha kylleng ki dong bad ki jaka ka konstitwensi ne kiwei pat.
Haba pynkut ia ka jingiakren u la ong ba ka rai baroh khoit ka dei ka jong

u paidbah bad lehse ka jingshah rem jong u ka dei ruh ba ki paidbah kim kwah ban tynrong ia ar tylli ki kam ha u. U la ong ba ha kine ki saw snem ba dang sah kum u MLA un shakri kham bha shuh shuh ia ki paidbah ka thain Sohra . Haba phai sha Mawkynrew, la iohi ba u Deputy CEM barim ym tang ba u la shah rem hynrei u la poi pynban ha ka kyrdan kaba lai, bad ha katei ka konstitwensi ruh u kyrtong ka Congress u bah Banteidor Lyngdoh (paidang) u la pynliem ia u bah Remington.
Lah ban pynkynmaw ba kham ha shuwa ia kane na ka liang u wei na ki nongialam ka UDP u Bah bindo M Lanong u la pynpaw ha ki khubor ba ka daw ka jingshah rem jong ka UDP ha kane ka kynti ka dei ruh na ka daw jong ka jingther pisa ka Congress.