Ka jingmih u Bah James kam ktah: Ardent

Shillong,3 Lber:
Tang ar sngi hadien ba u la wan ban pyniasoh ialade bad ka kynhun synrop ki seng riewlum , u MDC ka Mawhati u bah James Sylliang uba la jop kum u kyrtong shimet , u la mih noh na katei ka kynhun da kaba pynpaw ba ki paidbah ki kwah ia u ban leit ai jingkyrshan ia ka seng Congress. UBah Ardent Basaiawmoit u nongialam ka HSPDP ka seng kaba bun paid tam napdeng ki seng riewlum ha KHADC u la ong ba u bah James Sylliang u la wan dalade hi ban tyrwa ban ai ka jingkyrshan ia ki seng riewlum bad ym shym la ioh jingtip eiei halor ka jingmih noh jong u na ka ARPA hynrei la shu ioh jingtip lyngba ki kot khubor. Haba la kylli na u bah Ardent hato ka jingmih noh jong u bah James kan ktah ne-em ia ka ARPA , u bah Ardent u la ong “Kam don jingktah eiei ia ka Alliance” .
Ki la her ki khubor hamsaia ba ka jingmih noh u bah James ka dei na ka daw ba um don ka jingsngew tikna ban ioh long EM, halor katei ka hamsaia u bah Ardent u la ong ba u bah James u la wan tyrwa ban kyrshan ia ka Alliance bad la pdiang sngewbha ia u khlem kano kano ka jingteh kyndon ne ka jingiakular shuki EM, “Ngim lah ban kular EM iano iano hynrei lehse lah ban ai bynta lem ha kino kino ki bynta jong ka jingshakri ha KHADC” pynkut u bah Ardent uba la shim ruh ba kitei ki ktien ki long ruh kum ka jingpynsngew ia u bah James lada u kwah ban kyrshan ia ka kynhun ki seng riewlum kaba mut lehse ba wat lada yn ym donlad ban ioh long EM hynrei ki don pat ki kam kiba lehse ka kynhun kan ai sha u.