Wat pynshit pynsyaid ia ki nongkyrshan ban pynsniew, ong ka HNPF Ia kiba jop ha ka MDC

Jowai, 26 Rymphang:
Ka seng HNPF East Jaintia Hills District ka buh ka jingkyntu ia baroh ki paidbah jong ka District ba ki dei ban long kiba jai jai lashai ka sngi kaba dei ka sngi jong ka jingpyn bna ia ka risot jong ki kyrtong MDC kiba la dep ban iathep ha kane ka Elekshon kaba la long ha ka 24 tarik mynta u bnai.
Ka seng ka buh ka jingkyntu ba ym dei ban long kiba shongshit palat put wat lada u kyrtong uba ki kyrshan u poi sha ka thong jong ka jingjop. Ia kito kiba rem ruh kim dei ban iamrem shaba palat kat haduh ban pynmih ia ki huri hura hapoh shnong pohthaw. Ka jingioh ia uno uno u MDC uba dei u nongmih khmat sha ka iing dorbar jong ka Jaintia Hills Autonomous District Council (JHADC) ka long beit na ka bynta baroh lang bad na ka bynta ka bha ka miat bad ka roi ka par jong ki shnong ki thaw.
Na ka liang ka seng ka kyntu ruh ia ki bor pyniaid shnong khamtam ia ki Rangbah Shnong ba ki dei ban tehlakam bha ia ka shongsuk shongsain hapoh ki shnong ki thaw jong ki. Kim dei ban long kiba don liang ne shah shiliang iano iano. Lada jia ba don napdeng ki nong shong shnong kiba shah rem kim dei ban long ki sohpdung, da kaba shah kyntait shnong, hynrei ki RS ki dei ban kitkhlieh ba kan don ka shong suk shong sain hapoh ki shnong ki thaw jong ki. Kino kino ki nongshong shnong kiba shah ktah ha kum kane ka apot ki dei ban ai jingtip mar mar sha ki bor jong ka ain bad ki lah ruh ban pyntip sha ka seng khnang ba kan ioh ban iarap lem halor ka jingshah banbein jong ki.
Ha ka juh ka por ka seng ka kyntu jur ia ki MDC kiba jop ba kim dei ban pynshit pynsyaid ia ki nongkyrshan jong ki na ka bynta ban

pynsniew iano iano. Ki MDC kiba jop ki dei ruh ban pyntreikam shisha ia kaei kaba kila dep ban khlie ha ka por ba ki dang pynlong ia ka jingialap elekshong jong ki, ym ba kin shu sngap jar jar bad pyllut por ei tang ha ka jingiaknieh bor bad iaknieh shuki hapoh ka District Council, khlem da peit shu ia ka roi ka par jong ki shnong ki thaw ne ka imlang ka sahlang hapoh ka District hi baroh kawei. Ki nongmihkhmat kiba jop ha kane ka kynti ki dei ban sngewthuh ba ka dei ka mon jong u Blei kaba la shah ia ki ban long ki nongmihkhmat ia u paidbah ha kino kino ki liang ban pynmyntoi ia ka ri ka muluk, ong ka khubor na u President ka seng u ma Marshall Biam.