Nongstoiñ: U bah HL Nongsiang, uba la ju tip bad khot ieid ruh kum u Ma Ledy, ha ryngkat ka kynhun lem bad ki nongkyrshan ki jong u, ki la leit ban pyniasoh biang ia sha ka Seng National People’s Party (NPP) Mawshynrut Block, ha ha jingialang kaba heh bha kaba la long hynne ka sngi hapoh Shallang.
U Bah H.L Nongsiang u ba dang ia khublei kti bad u MLA ka Mawshynrut hadien ba ma u lem bad ka kynhun kila pyniasoh biang sha ka Party NPP.
Ia katei ka jingialang ban pdiang ia katei ka kynhun sha ka seng NPP, la pyniaid da u Working President ka seng NPP Mawshynrut Block u Bah Gardinal Sohshang ha ryngkat ka jingiadon lang u General Secretary jong ka NPP State Unit u Bah Setsing Dkhar, u MLA ka thaiñ u Bah Gigiur Marthong, u Bah Alfred Kharbani Vice President ka NPP District Unit bad da ki hajar ngut ki nongkyrshan ba radbah jong katei ka party.
Kum ban shu pynkynmaw ba u bah H.L. Nongsiang, u dei u wei na ki nong seng jong ka Party NPP hapoh ka thaiñ Mawshynrut bad ha u snem 2018 u tei u riew rangbah u ba ju ialam ia ka party u la mih noh namar ki kynrum kynram ha kaba iadei bad ka rai ticket ha ka ilekshon MLA kaba dang shu dep bad u la mih madan ruh kum u kyrtong shimet ban iakhun ha katei ka ilekshon MLA bad u la shah rem bad ioh ruh haduh ar hajar tam ki vote.
Katei ka jingleit phai sem biang I Ma Ledy ka dei hadien ka jingkwah jong u Bah Gigur kum u MLA ban lum ban lang ia ki nong kyrshan kiba la sakma ha kaba u tei u rangbah u ba long kum u kpa jong katei ka thaiñ u la mynjur ban iatreilang bad u tei u MLA khamtam ha ki kam pynroi ban kyntiew ia katei ka thaiñ kaba dang sahdien.
Haba kren ha katei ka jingialang pdiang burom kaba la long hapoh iing sah jong u MLA kaba ha San Kilo Shallang u la iathuh ba ka party NPP ka dei ka party kaba don iaka rukom treikam kaba biang bad ba ka jingiatylli ka dei kawei na ki mat treikam jongka bad dei halor katei ka bynta ba un pynrung biang ialade sha katei ka party kaba u la iehnoh shisnem mynshuwa.
U Ma Ledi u la iathuh ruh ba u la rung sha ka jylli jong ka sain hima sima naduh u snem 1971 ha kaba mynta ka kynti u la mut ban ieh noh ia katei ka kam bad ban shong thait noh, hynrei kyndit kynsan u Bah Gigur MLA ka thaiñ u ba long kum u khun jong u, u la wan ban pan ka jingiatreilang na ka bynta ban kyntiew ia ka thaiñ kumta um banse ban piar biang ia ki thapniang jong u ban trei ia ka politik na ka bynta ka roi ka par jong katei ka thaiñ.
Shuh shuh u la ong ruh ba ka kam sain hima sima kam dei ka kam shimet jong u hynrei kadei ka kam na ka bynta u paitbah namar ia mynta ka Civil Subdivision ka la ieng hapoh katei ka thaiñ hynrei ka don kam pat ban pyntrei kam ha ka rukom kaba dei bad ka donkam ia ka jingiatreillang bad u MLA namar tang ma u um lah da lei lei khlem ka kti ka diang ka kti ka mon jong ki riew rangbah bad ki briew kiba iohi jngai.
Ym tang kata u Ma Lesi u la ong ruh ba ha ka politic ngi donkam ia ka jingiasuk namar khlem ka jingiasuk ngim lah ban wanrah ia ki kam pynroi hapoh ka thaiñ bad ban kyntiew ia ka thaiñ ha kawei pat ka kyrdan kaba kham shaneng bad ba kadon kam ban don ha kajuh ka party ne ka iing ban wanrah ia kino kino ki kam pynroi.
Katba na ka liang jong u Bah Gigur Marthong MLA, ha ba kren ha katei ka jingialang pdiang burom ia ki nongkyrshan ba thymmai sha ka party u la ai khublei ia baroh ki riew rangbah kiba la pyniasoh biang sha ka party NPP, u la ong ruh ba ngi kiba bun ngi mih ban ialeh ilekshon hynrei ngi don kajuh ka thong bad kata ka long ban wanrah ia ki kam pynroi ia ka thaiñ, hynrei ynda ka ilekshon kala dep mynta ka donkam pat ban ia tylli bad ban ai ka jingiatreilang kaba pura namar ka por ban ia shrut ka por ban ia nia kala kut hynrei ngi donkam tang ia ka jingiatylli bad ban wanrah ia ki kam pynroi.
Shuh shuh u Bah Gigur u la ong ruh ba um lah shisha ban trei marwei kat ia ka thaiñ Mawshynrut kaba iar hynrei ngi donkam ban wanrah ia ki briew kiba shemphang bad kiba don ka jingkitkhlieh na ka bynta ka thaiñ ban iarap lem ban buddien ia ki kam pynroi hapoh ka thaiñ kaba dang sahdien.
Kumta u la iawer ba ka party NPP kaba nangkhlain katba nangmih ki sngi ba kin ieng tylli sa shisien ba kin ioh ruh iaka jingjop sa shisien ha kane ka election ka ban dang wan.
Ha katei ka sngi la ioh ruh iaka jingkren na u Bah Setsing Dkhar, General Secretary NPP State Unit, Bah Alfred Kharbani bad kiwei kiwei, la ioh ruh iaka jingpdiang kaba donburom ia u Ma Ledi ryngkat ka kynhun jong u kiba la wan da ki spah ngut ban pynrung thymmai sha katei ka seng NPP.