Palat 70 percent ha KHADC, 50 percent ha JHADC; thep vote MDC

Shillong, 24 Rymphang:
Palat 70 percent ki paidbah ka Khasi ki la wan thep vote bad 50 percent ki wan ha Jaintia Hills ha ka jingthep vote kaba long hynne ka sngi Nyngkong sha ka KHADC bad JHADC.
Haduh 70.8 per cent na 6.68 lak ngut ki nongthep vote ki wan ha Khasi hills bad58 percent na ki 2.09 lak ngut ha Jaintia hills ki la wan ban jied ia ki kyrtong, la ong u Commissioner & Secretary ba peit ia ka District Council Affairs (DCA) Bah Jop thiaw Lyngdoh hynne ka sngi Nyngkong.
U Bah Lyngdoh u la iathuh ba ka jingwan jong ki briew ban thep vote ka long haduh ka por 7 baje janmiet bad ka lah ban kham kiew.
U la ong ba ha East Jaintia hill ka jingwan ka long kaba kham rit. Ha Sohra, ka jingdon ki briew ba wan thep vote ka long 82.38 % bad ha Shella ka long 73.95 %. Ha Jaiaw ka long 65%, Laban – Mawprem – 65%, Nongthymmai – 62%, Laitumkhrah – Malki – 64, Mawlai – 70, Mawphlang-Diengiei – 78, Mawkhar-Pynthorumkhrah-83.93, Sohryngkham – 79, Mawkynrew-75, Nongkrem – 73, Langkyrdem-Laitkroh – 75, Nongshken – 76, Umsning – 75, Umroi – 75.86, Mawhati – 60.53, Jirang – 49.25, Nongpoh 68.53.
U la ong ba ka jingthep vote ka long kaba iaid beit lait noh tang ha ki katto katne ki jaka ba don ka jingthut. U la ong ba ka jingjia ba kham heh ka dei ha Umladang polling station kaba hap ha Nartiang-Umladang constituency ha West Jaintia hills district ha kaba kumba 30 – 40 ngut ki briew ki la rung jubor sha jaka thep vote bad ki pynpait ia ki mashin EVM.
Baroh 123 ngut ki kyrtong kin iakhun na ka bynta ka kam 29 tylli ha KHADC bad 89 ngut ha JHADC.
La don 14 ngut ki kyrtong kynthei, kynthup 12 ngut na Khasi Hills bad ar ngut ha Jaintia Hills.
Ka Congress ka iakhun 58 tylli ki konstitwensi katba ka UDP ha ki 45 tylli ki konstitwensi. Ka HSPDP ka pyniakhun 25 ngut, ka KHNAM 13 ngut, NCP – 7 ngut, bad ka NPP ka pyniakhun tang iwei nalor 63 ngut ki kyrtong shimet. Ka jingniew vote kan long ha ka 27 tarik sngi Palei.