Shillong: U Bah Witness Day Sancley, uba la iakhun ia ka ilekshon MLA na ka Congress, u la phet noh na ka Congress sha ka PDF bad un iakhun mynta na kane ka party ha kane ka elekshon MDC kaban long ha ka 27 tarik Rymphang.
U Bah Witness u la iakhun ia ka ilekshon MLA na Jirang constituency bad shah rem salit ha u Bah Sosthenes Sohtun ka National Peoples’ Party.
U Bah Witness u la phah ia ka shithi weng noh ialade na ka seng Congress bad un iakhun noh ia kane ka MDC na ka PDF.
Ka Congress ka la ai tiket ia u Bah William Mynsong ban iakhun ha ka ilekshon MDC na Jirang.
“Ka rai ba nga la shim ban pan tiket na ka Peoples’ Democratic Front (PDF) ka long hadien ka jingiamir jingmut bad ki nongkyrshan kumba ka la long shwa ba ngan shim rai ban ieh noh ia ka Congress”, la ong u Bah Witness.
U la bynrap ba ula don ka jingiakren ruh ban ia treilang bad u MLA barim ka Jirang, u Bah Wallambok Mylliem.
Kum ban shu kdew ba u Bah Wallambok Mylliem u la pyniasoh bad iakhun na ka PDF ha ka ilekshon MLA ha u snem ba la dep bad uba la wan ha ka kyrdan ba lai.