Mawkyrwat: Ar ngut ki briew ki la mynsaw jur bad saw ngut kiwei pat ki la mynsaw malu mala, hadien ba ka kali Bolero Camper kaba ki shong ka la thung baji noh sha riat Thawlong hajan Iew Mawkyrwat.
Ka kali Bolero Camper kaba la noh sha riat Thawlong hajan Mawkyrwat
Katkum ka tyllong khubor ba la ioh lum la ong ba katei ka kali Bolero Camper kaba don ia u number MLO5 N 8763 (Private) kaba dang wan na ki thaiñ Kynrang bad thmu ban leit sha Iew Mawkyrwat ban leit die kwai bad tympew, hynrei mar ia poi ha katei ka kumno re kumno katei ka kali ka la noh beit sha katei ka riat.
Shuh shuh ka tyllong khubor ba la ioh lum ka iathuh ruh ba katei ka jingjia ka la jia mynta ka step ha ka por kumba 9:00 AM bad ia katei ka kali la niah da u Coldbiness Kharraswai 24 snem ka arta bad ia ka daw jong katei ka jingnoh jong katei ka kali haduh ba la thoh ia kane ka khubor ym shym pat la lah satia ban tip.
Kiba la mynsaw jur ha katei ka jingjia ki kynthup ia I kong Iarliss Kharraswai 45 snem ka arta, kong Nancy Marwein 60 snem bad ia kitei ki ar ngut la phah kit noh mar mar sha Shillong, khnang ban ioh ka jingsumar kiba kham bha katba ia kiba mynsaw malu mala la phah sumar noh ha CHC Mawkyrwat bad kitei baroh ki dei na ka shnong Kynrang jong ka thaiñ Mawsynram.