| Nongpoh: Ha ka jingjia pluhiing ba shyrkhei kaba la jia hynnin shiteng synnia ha Patharkhmah, ki la don haduh Hynniew tylli ki dukan, ki la ingkhong khait bad kylla dpei hadien ba ki la shah bamduh ha ka ding ba shyrkhei kaba la klang kynsan khlem da tip ia ka daw.
Ka jingtip kaba la ioh ban lum da ka u nongthohkhubor, la iathuh ba katei ka jingpluh jong kitei ki iing ka la sdang ha ka por 1:30 ei ei, ha kaba ka ding ka la sdang ban kem ding na kawei ka dukan kaba don hapdeng, hynrei suki suki ka la par sha kiwei pat ki dukan tad haduh ba kan da ioh ban bam shnaim ia kitei ki hynniew tylli. La ioh jingtip ruh, ba ki paidbah tang mar iohi ia katei ka jingkem ding ki dukan, ki la pyrshang ban lei tai jingiarap da kaba tem ia katei ka ding, hynrei namar ba katei ka ding ka la klang shaba palat, ka pynlong ia ki paidbah ba kin ym lah ban leh ei ei, watla katta ki paidbah kim shem la shongthait hynrei ki la lah ban pyllait ia ar-tylli ki dukan na ka jingshah bam ha ka ding. Kitei ki dukan kiba la shah bamduh ha ka ding, ki kynthup ia ka dukan jong u Bah Smilling Makri, u Bah Keron Syngkli, u Bah Standard Lyngdoh, u Bah Kordor, Gobin Syiemlieh, ka Kong Pleasure Wahlang, ka Anita R. Marak lem bad ka jong ka Mohina Boro, na kitei ki dukan ki don ki dun barit bad don ruh kiba heh, la ioh jingtip ba haba khein kyllum ka jingjulor ka la poi sha phew lak tyngka. |
