Nga la jop, nga shu leit ai khublei ia ki paidbah: Sanbor

Shillong, 20 Rymphang:
U kyrtong MDC ka NCP na Laban-Mawprem u Bah Sanbor Shullai u la ong ba u la don ha ka jingjop ha kane ka elek shon bad ka jingleit ialap elekshon jongu, ka long ban shu lei tai khublei sha ki paidbah.
U Bah Shullai uba dei ruh u MLA ka South Shillong constituency u la ong ba ka jingong ba bam armaloi kum u MLA bad MDC kam don eiei ban ktah namar ba ka shong ha u paidbah ban jied. “Ki paidbah ki ai ban shakri, ar maloi ne lai maloi ne saw maloi ruh kam lei eiei haba lah ban shakri ia ki paidbah”, la ong u Bah Sanbor.
“Kum u MLA bad MDC nga shakri kumjuh hi khlem don jingiapher eiei”, la ong u president ka NCP bad bynrap, ba ki paidbah ki dang kwah ban aiti biang ha u kum u nongniah ba la tbit namar ba ki sheptieng ia kiba thymmai ioh kin pyntyllun kulmar.
Ha kawei ka liang, u Bah Shullui u la ong ba ka Para 12 A ka 6th Scheduled la dei ban weng noh namar ba ka la pyntlot bor ia ka district council. “Kane ka dei kaba donkam ban pynkhlain ia ka district council”, la ong u Bah Shullai ha kaba u la iathuh ruh, ha ki snem ba long CEM u Bah HS Shylla, ki MDC ki la leit iakynduh ia u myntri ka sorkar pdeng ba peit ia ki tnad Tribal Affairs ia ka jingdonkam ban weng noh ia kane ka kyndon.
Hynrei haduh mynta ka dang sahteng bad katkum ka jingong u Bah Shullai, lada ka sorkar kam sngap, la dei ban khot ban lum lang ia baroh ki rangbah shnong, ki hima bad ki paidbah ban leit dawa ban weng noh ia kane ka Para 12A ka 6th Scheduled.
Ha kane ka kynti ka Laban-Mawprem kan sakhi ia ki kyrtong na UDP u Bah Federick Joplang Lynshiang, na Congress ka Kong Yalanda R Mylliemngap, Andreas Kharkongor na KHNAM, Bah Banrikupar Wahlang na HSPDP.