Lyngngoh ka UDP ba kop u Mukul ban sei madan ba donkti bad ki seng lehnoh

Shillong, 20 Rymphang:
Ka UDP ka la ong ba ka lpng kaba sngew lyng ngoh ba u Myntri rangbah ka jylla u Dr Mukul Sangma u la kop ban sei madan ia ka jingdonkti jongu bad ki seng lehnoh ha ka jylla.
“Ngi kwah ban pyn kynmaw ia u myntri rang bah ba u Ajaju Marak uba dei u political secretary ka ANVC (B) uba sei madan ia ka jingkynnoh ba u Myntri Rangbah u donkti bad ki seng lehnoh. Ngi shu pynsngew ia kane sha ki paidbah bad ngi dawa ba dei ban pynlong ia ka jingtohkit halor kane” la ong u Secretary ka UDP u Bah Allantry F Dkhar ha ka kyrwoh ba la pynlait.
U Bah DKhar u la ong ba ka sorkar ka dei ban thung ia ka jingtohkit kaba laitluid ban pynshisha halor kane. Kaba biang eh dei ban aiti ha ka CBI ne ha ka NIA.
“Ngi kwah ban iathuh ia u Myntri rangbah ba ka UDP ne ka ANVC (B) lane ka CBI lane ka NIA ban ai sakhi ia ka jingdonkti jongu bad ki seng lehnoh” la ong u Bah Dkhar.
U la ong ba ka party kam sngew iahap ba u briew uba bat ia ka kyrdan myntri rangbah un shu bret ia ka jingkitkhlieh sha kiwei pat tang ban lait na lade.
“Phi tharai ka High Level Scrutiny Committee shwa ka kaiphod ka CBI kaba shu pynslem kai bad ruh ka jingbamsap ba la lap ia u CEM ka JHADC u Bah MB Rymbai ba la leh ia kiwei kin ioh ia ka jingpynshitom kaba iadei bad ki kam jongki”, la ong u Bah Dkhar.
Kham mynshwa, u Dr Sangma u la ong ba ai ba kin pynshisha ba u donkti bad ki seng lehnoh.