Jowai: Mynta ka sngi sa ar tylli ki kynhun kynthup ia ka Indian Navy bad ka Odisha Fire Service kin pyrshang ban pynlait ia ki 15 ngut ki briew kiba la sahkut ha ka krem dewiong. Ka National Disaster Response Force (NDRF) kaba la pyrshang katba lah ban pynlait ia kine ki nongtih dewiong naduh ka 14 tarik Nohprah kan dang don ryngkat bad kine ki ar kynhun khnang ban ai jingkyrshan kaba kham bha shuh shuh.
Ka kynhun jong ki lai ngut ki shipai Navy, uwei u ophisar bad ar ngut ki nongjngi kiba tbit bad ki 21 ngut ki briew jong ka Odisha Fire Service ki la wan ban peit ia kane ka jaka ha ka sngi Saitjain bad kine ki ar kynhun ki la ioh ruh ia ka jingbthah na u Santosh Kumar Singh, assistant commandant, 1st Battalion of the NDRF.
“Ngi la bthah bad iathuh ia ki ia baroh ki lad ki lynti kiba ngi la dep ban leh naduh kaba sdang jong ka jingtrei jong ngi,” la ong u Singh sha ki lad pathai khubor.
Hadien ka jingwan jong kitei ki ar kynhun, u Singh ula pyni bad batai bniah ia ka jinglong ka jaka bad ki jingeh kiba ka kynhun jong u ka la iatyngkhuh ha kaba iadei bad ka jingsei ia ka um na ka krem. U Singh ula iathuh ruh ba ki briew jong ka Odisha Fire Service kin pyrshang ban sei ia ka um na ka krem katba ki shipai Navy kin leit ban wad ia ki nongtih dewiong.
“Ka NDRF kan ai ia ka jingkyrshan ia kine ki ar kynhun,” la ban shuh shuh u Singh. “Ki briew jong ka Odisha Fire Service ki la pyrshang ia ki tiar ki jong ki ha kane ka jaka.”
Une u heh jong NDRF ula iathuh ruh ba ki shipai Navy ha ka sngi Saitjain ki la hiar sha kane ka krem tad haduh ban da tyngkhuh ia ka um khnang ban sngewthuh bha ia ka jinglong jong ka jaka.
Katkum ki tyllong khubor jong ka Navy ki la iathuh ba haduh 11 ngut ki shipai ki dei ban sdang ban treikam naduh ka step jong ka Sngi U Blei mynta ka taiew bad ki tiar ba remdor jong ki kin iarap ia kine ki shipai ba kin ngam sha ki jaka kiba bun bad kiba jylliew jong kane ka krem.
Ki heh jong ka NDRF ki la iathuh ba ka jingjylliew jong ka um ka kot haduh kumba 176 phut ei ei. Kane ka long ka kam kaba eh wat ia ki nongjngi batbit jong ka Navy namar ka rukom long jong kane ka krem ka long ba haduh 176 phut ka jylliew bad ha kaba kut jong kane ki don sa ki thliew tih dewiong kiba rit bad kiba bun ha baroh ki liang.
Na ka liang jong ka sorkar, u Additional Deputy Commissioner bad u Superintendent of Police, East Jaintia Hills ki la pyrshang katba lah ban ai ia ki jingkyrshan kiba donkam bad ban jubab ruh ia kiba bun ki jingkylli.
Ka krem dewiong kaba jylliew ban sei ia ki 15 ngut ki nongtih ha Ksan, Jaintia Hills