Nalor u Fredrick bad ki 13 ngut, bun ki dkhot sengbhalang ba la pyniasoh, kam ka HNLC

Shillong, 19 Rymphang:
Ka HNLC ha ka kyrwoh ba ka la pyllait paidbah da u Publicity secretary jong ka u bah Sainkupar Nongtraw ka la kam ba nalor u Bah Fredrick Kharmawphlang Vice President KSU bad ki 13 ngut kiba la leit ban pyniasoh bad ka seng, ki la don ruh bun ngut ki sengbhalang kiba la leit pyniasoh bad ka na ka bynta ban iada ia ka jait bynriew Hynniewtrep. Ka HNLC ka la pdiang sngewbha ia ka jingwan pyniasoh jong ki samla kiba la shah thwet ha ki pulit namar ka jingiakhih jong ki ban pyntreikam ia ka ILP ha ka jylla. Ka kyrwoh ka la ong ba ki bahaing jong kito ki samla kiba la leit ban pyniasoh sha ka seng ki dei ban sngewsarong na ka bynta ki khun jong ki kiba la wan ban iakhun na ka bynta ka jaitbynriew. ‘ka HNLC sa shisien biang ka plie ia ka jingkhang na ka bynta kito ki samla kiba don ka jingsngewkhia na ka bynta ka jaitbynriew Hynniewtrep ba kin wan ban pyniasoh sha ka seng’ pynkut ka kyrwoh na ka HNLC.