Lada ym patiaw ka sorkar Meghalaya sha Delhi byrngem leit ujor ki trai trok

Shillong, 18 Rymphang:
Ki trai jong ka Goal para District,Assam hapoh ka lama jong ka Goalpara District Truck Owner Association, Assam ki la sangeh ka kamai trok naduh mynhynin ka sngi ka 17 tarik u rym phang ban pyrshah ia ak jinglum khajna bad ka jingkhrong pisa be-ain ia ki trok kit dewiong ha shilynter ka surok NH-62 bad NH-37. Halor katei ka jingkhrong pisa be-ain u President katei ka Association u Abul Kalam Hussain u la ong ba ka seng ka la pyrshang ban ia kynduh ia u Myntri Rangbah ka jylla u Dr.Mukul Sangma mynta ka sngi hynrei kim shym la ioh lad ban ia kynduh ia u, katei ka seng ka la pynkhreh ruh ia ka mat jingdawa na ka sorkar Meghalaya kaba ki la phah lyngba ka jingthoh sha ki Myntri sorkar ka jylla ba kin shim khia ban weng noh ia kitei ki khyrdop khrong pisa be-ain.
Haba kren sha ki nongthohkhubor mynta ka sngi u Hussain u la ong ba lada ka sorkar Meghalaya kam shim khia ban leh eiei halor katei ka jingshah khrong pisa jubor kin lei twat shaduh Delhi ban pynsngew ha ka sorkar India. “Lada u CM um patiaw ngign lei twat shaduh u PM ruh” ong u Hussain. Utei u nongialam ki trai trok na ka jylla Assam u la iathuh ba ki trai trok kiba wan kit dewiong na kane ka jylla ki ia kynduh jingeh namarba la bun palat ki khyrdop khrong pisa kynthup ia ka jong ka sorkar bad ka jong ki pulit nalor ki khyrdop jong ki briew ki bym tip la ki dei ki jong no.
U Hussain u la pyntip sha ka sorkar Meghalaya ba tang ha North Garo Hills NH-62 ka jingkhrong pisa ka la poi sha ka T.1700 tyngka kata ruh tang na ki trok kiba thylli, ha katei ka district ki don 2 tylli ki khyrdop khrong pisa ki pulit bad ar tylli kiwei pat katba ki trrok kiba kit jingkit ka bai khrong ka poi T.4000 tyngka ha katei ka District. Ha EGH ka poi T.400 tyngka, ha South Garo Hills T.200 tyngka , baroh ka poi T.2,300 tyngka bad na ka bynta ki trok ba kit dewiong pat ha SGH ka poi T.3200 tyngka ,EGH T.6500 tyngka ,NGH ka poi T.14,797 tyngka. Haba kheinlang baroh ka bai siew khajna ka poi baroh T.30,497 tyngka laitnoh ka DMR kaba T.7,287 tyngka. U Hussain u la batai ba ka khajna na ka bynta ki trok ha Meghalaya ka kham rit bad ka iapher shibun na ka khajna ia ki trok Assam.
Ia katei ka juh ka mat jingdawa ban weng ia ki khyrdop khajna ka Association ka la pynsngew ruh sha ka sorkar Assam, bad ka la ai jingtip ruh sha ki pulit ka Megha;laya bad Assam kumjuh. Ka Association ka la sdang ia ka sangeh kamai khlem buh por naduh ka 17 tarik mynta u bnai naduh ka por 6 baje mynstep.