Shillong: Ka khubor na ki heh Congress ki la iathuh ba ka MDC ka Nongshken konstitwensi ka kong Grace Mary Kharpuri ka la shim phom tiket MDC na ka seng Congress bad ki la iathuh ba shen kan sa rung noh sha katei ka seng na ka bynta ban ia khun ia ka tiket MDC na Nongshken konstitwensi ha ka elekshon MDC 2019. Ki khubor ki la saphriang ruh ba ka kong Grace ka la rung seng hapoh ka seng Congress bad ki heh Congress ki la iathuh ba ha kine ki sngi ki la ia kynduh na ka por sha ka por ia ka kong Grace ban iakren ba kan rung noh sha katei ka seng.
Haba ia kren pat bad ka kong Grace ka la kyntait ba ka la rung seng hapoh ka seng Congress bad ka la ong ba haduh mynta ka dang shong pyrkhat bad ki nongkyrshan jong ka. Ka kong Grace ka la jop ia ka elekshon MDC nyngkong eh kum ka kyrtong shimet ha ka por ba u bah Donkupar Massar u la long u MLA jong ka Nongshken. Hadien katei ka la jop ia ka elekshon MDC kaba ar na ka seng HSPDP bad mynta la ong ba kan iakhun na ka seng Congress watla kam pat shym la kren shai sha ki lad pathai khubor.