Shillong: Ki Muster Roll na Jaiñtia Hills hapoh ka lama ka Jaintia Public Work Department Muster Roll Worker & Labour Union (JPWDMRW&LU) kynthup kynthei bad shynrang mynta ka sngi ki pynlong ia ka jingshong shah thngan ba khlem pud sngi halor ka jingbym siew bai bylla la 7 bnai eiei mynta nalor kiwei pat ki jingdawa.
Kine ki Muster Roll kiba don kumba 300 ngut eiei, ki la pynlong ia ka jingiakhih shah thngan ba khlem buh por ha phyllaw ka Jaka Pynieng Kali ha Additional Secretariat da ka jingioh jingbit na ki bor District ka East Khasi Hills.
Ki jingdawa jong ki, ki long ban pyntreikam ia ka Regular Casual Workers Scheme 1996 kaba ju kyntiew kyrdan ia ki nongtrei muster roll kiba trei duna 10 snem bad la donkam kiba lait ha tnad sorkar ha ka kyrdan grade IV, dei ban thung ia ki da ka jingsiew kaba biang. Kawei pat ka jingdawa jong ki, ka long ban pynkiew bainong sha ka T. 300 shi sngi l tarik Iaiong 2018 namar ba mynta ki ioh ka jingsiewkaba tang T.187 tyngka shi sngi ia kiba khlem pat tbit bad dei ban pynkiew ia kiba la kham tbit.
Ki la dawa ban pyntreikam ia ka skhim ka Meghalaya Building Construction schemes namar ba haduh mynta kim ioh eiei na kane ka skhim ka sorkar, ka jingsiew tulop man u bnai, ka de kawei ka jingdawa jongki nalor ka shuti ioh khyllung. Ki la dawa ruh ban pynlait noh ia ka arrear bad ban ai baibam tymmen ia kiba la palat 60 snem nalor kiwei ki mat jingdawa.
“Ngin shong beit hangne haduh ba ka sorkar kan ai ia ka jubab. watla ka DC ka la shah ba ngin shong tang haduh 4pm hynrei ngin nym khih lada ym ioh jubab na ka sorkar, ngin shong baroh shi miet”, la ong u bah K Lamsalanki Pariat President ka JPWDMRW&LU.
U Bah Lamsalanki u la ong ba haka 5 tarik Nailur 2018 la dep ai ia ka dorkhas bad hadien la phah pynkynmaw biang ha ka 15 tarik Naiwieng hynrei khlem ioh jubab eiei na ka sorkar bad ha ka 30 tarik Naiwieng, lah pynlong ia ka jingiaid paidbah ba jai jai ha Jowai bad la phah ruh 10 sngi ka jingbuh por sha u Myntri Rangbaha kaba kut ha ka 12 tarik Nohprah hynrei khlem jubab bad dei hangne ba la hap ban wan shah thngan khlem pud haduh ban ioh jubab.
Katba u bah Shambor Dkhar u general secretary u la ong ba ula ong ba ki nongtrei muster roll kim pat ioh bainong haduh 7 bnai eiei mynta bad kane ka la buh jingeh ia ki. U la iathuh ba dang ha ka 3 tarik mynta u Bnai ka la leit ban dorkhas sha u Myntri Rangbah ka Jylla u Conrad K. Sangma u lyngba u Political Advisor u Bah Allantry Dkhar ban kyrpad ban kitkhlieh lem ban pynïoh ïaka jingdawa jong ki hynrei haduh mynta kim pat ioh jubab satia.