Dap pura ka seng HSPDP 50 snem ha ka jingiaid lynti:90 percent ka UDP bad ka HSPDP ki don kajuh ka thong, ong u Dr Donkupar

Shillong: U President ka United Democratic Party (UDP) uba long ruh Lamphang ka iing ka jylla u Dr Donkupar Roy, u la ong ba ka seng Hill State People Democratic Party (HSPDP) bad ka UDP ki dei ki seng riewlum kiba rim tam ha ka jylla bad ki jingthmu jongki ruh ki long kumjuh bad ki shu iapher kai malu mala.

                Haba kren ha ka jingrakhe pynkut dap 50 snem ka seng HSPDP kaba long ha kane ka sngi Saitjain ha State Central Library Shillong, u Dr Donkupar u la ong, “ka UDP bad ka HSPDP ki dei ki seng ba rim tam ha ka jylla. Kine ki dei ki seng lajong, ha kaba ngi don kajuh kumba 90 percvent na ka 100, ngi shu iapher kai malu mala”.

                “Lada ngi kwah ba ka seng kan kiew bad sngew srong ia ka jaitbyntiew, dei ban neh bad kyrshan ia ki seng riewlum”, u la bynrap.

                Haba pynpaw ba ka donkam ban pynkhlain ia ki seng riewlum ban shakri ia ka jylla lajong, u Dr Donkupar u la ong, “Phi kiba don ha ka HSPDP pynkhlain ia ka HSPDP, ka UDP ruh kumjuh bad kan don ka por ba ngin lah ban ioh ia ka jingangnud jong kito ki nongseng mynshwa”.

                U la pynpaw ba ka jingtlot jong ki seng riewlum ha kane ka jylla, ka dei namar ba ki iamih bun palat nalor ka jinglong duk jongki.

                “Balei ki seng riewlum ki tlot ha ka por elekson dei namar ba bun palat ki seng riewlum bad kane ka la pynpait ia ka vote bad kane ka la pynlong ia kiwei ban jop suk. Lada baroh ki wan hajuh kan long ka borbah bad ia kane ngi la iakren la bun snem hynrei kawei hadien ka wan kam shym la urlong”, u la ong.

                U la ong, “Ki seng riewlum kin long ka deity jong ka jaitbynriew, peit kumba jia ha Mizoram bad kumjuh ha Telangana ba la synshr ki seng trai ri, baroh ka ri ki la phaikhmat”.

                Haba kren shaphang ka HSPDP khamtam ia u nongialam ba radbah jongka u bah Hoping Stone Lyngdoh bam kwai ha duwai u Blei, u Dr Donkupar u la ong ka jingrakhe ia ka jingdap 50 snem ka HSPDP, ka dei ka jingai burom ia ki nongseng jongka, ki 13 ngut nalor u Bah Hoping.

                U la ong ba ka jingnoh synniang ba khraw tam ka HSPDP ia ka jaitbynriew ka dei namar ka jingioh kloi ia ka jylla Meghalaya. “Ngim dei ban klet ba ka jingnoh synniang ka HSPDP kaba khraw ka dei ka jingioh kloi ia ka Hill State ne ka jylla Meghalaya hapoh ka jingialam u bah Hoping”.

                U Dr Donkupar u la ong ba  u la ioh lad ban iatreilang bad u bah Hoping kumba 28 snem bad u sngewthuh bha ia ka jingthmu jongu kum u nongialam paidbah.

                U la iathuh ba u Bah Hoping u ju pynpaw ia ka jingsngew khuslai ia ka lawei jong ki seng riewlum ha ki por ban wan namar ka jingiaphet ki MLA/MDC ynda la jop.

                U President ka UDP u la ong ba ha ka por ba iakhih pyrshah jong u bah Hoping ban ioh ia ka jylla ba pura u dang pule klas VIII.

                “Nga dang pule klas 8 ha Ram Krishna Mission ha Sohra ha ka por ba khot ban iakhih pyrshah jong u bah Hoping ia ka jingai sub-state, ban dawa jylla ba pura. Ha kata ka por, ngi ia mih tuh na skul ban wan rah lama iong  bad kato ka dei ka jingsdang jong u bah Hoping”, la ong u bah Hoping.

                 U la ong ba ki paidbah ki ai ka jingshaniah kaba pura ia ka nongrim ka HSPDP hynrei kine ki snem ki la iaid 50 snem kumno ka la long bad kumno ki seng riewluim ki long mynta.

                U Dr Donkupar u la pynkynmaw ia ka jingong u bah Hoping, ba u la pynjop bun ki MLA  hynrei kumba 20 ngut ki la shet kylla da kaba phet ynda la jop.

                “Nga shu kwah ban kyrpad ia kito kiba phet ynda la jop na ki seng riewlum, ba kin nym kylla nongrim hadien ba ki la ioh jinghikai”, u la ong u president ka UDP bad bynrap, lada long kaba lah kiba la mih ngi kyrad ba kin wan biang, bad kiba ialeh ia ka elekshon lada jop wat phet bad neh beit ha ka party.

                 U la pynpaw ia ka jingsngew bynniaw ia ka jingwan hiar thma ka bor pisa naduh u snem 2003, haduh ba ki paidbah kin klet ia ka nongrim ban biej ha ka bor jong ka pisa.

                “Shwa ka 2003 ngim ju tip ia ka bor ka pisa por elekshon hynrei kyndit ka wan ka bor ka paisa ha ka por elekshon. Ngi kumba bun ki dong ka jylla ki la klet ia ki seng lajong bad ki iabeh ia ki seng ba kham pahuh pisa bad ha kane ka elekshon shiteng samoi na Ranikor ka UDP ka la jop bad ka jingtreialang bad ka HSPDP. Mynta nga sngewthuh ba lada ngi ki seng riewlum ngi don tang shi powa na ka pisa ba don ki seng heh, ngi la jop hynrei bun ki jong ngi kiba duk suda”, u la ong.

                U la bynrap biang, “Nga sheptieng ioh kan jia ba ngin shah synshar ha kiwei pat bad kaei kaban jia haba shah synshar ha kiwei bad ngin duh noh ia ka jignangnud jong ngi ia ka jinglong kynrad ha lor ka jaka ka puta, ka deiti ka jaitbynriew.