Ka jingia ai jait kmie ne kpa? Ka jingiasam bynta ia ki khun kynthei bad shynrang!

Kane ka dei ka bynta ba ngi iohi khari khari ia ka jing iatai jingiania hapdeng ki khynnah Internet mynta don kiba iashah jait kmie don kiba iashah jaitkpa. Don kiba kwah dohkyndang lem na iing kmie khamtam ki katto katne na ki khun shynrang jong ka ri jongngi. Kine ki jingkwah kim dei kiba bakla namar baroh ngi kwah ia kaba bha. Ki khynnah samla internet ki la dei ban ia burom markylliang ia ka jingia pyni ka jing iatai khlem da ia shun ia buhnud. Ai kan mat sah tang ha ka jingiathir ia pyni par aba ia don nia ym pat ban ia sin ia rngop para byriew namar kan shu sah sniew.

Khyndiat shaphang ka jingai jait kmie

Nga ju kylli na I mei rat ha ka por ba I dang im, balaei ba ngi ai jait kmie? I iathuh ba kat kumka jingtip byrngut byrnget jong ka dei ba ha ka jingiaid lynti ban wad ia ka jaka ba biang ban buhai shnong ki kmie ki kpa tymmen jongngi ki hap iaid  ia ki lynti ba jlan, hiar ia ki riat ki them hap kam ia ki wah rit ki wahduit. Dei ynda haba poi ha kawei ka Wahbah wahsan ki kynthei ki khynnah kim nud shuh ban jam sha shiliang wah kumta ki sah noh sha Shiliang. Dei tang ki rangbah kiba nud ban jngi sha shiliang. Ynda haba ki poi sha ka jaka them ki sngewthuh ba ka pateng jong ki kan sa duh noh kumta ki khot ia ki thei na ri them ban ia shongkha bad ki bad khnang ban khring ia ki thei na ri them ban ia shongkha bad ki, kine ki rangbah ki kular ba ia ka jait ka kynja ka ioh ka kot yn bat hi noh da kynthei. Dei hangne ba s dang ka jingai jait sha ka kynthei. Kane ka jingiathuh khan aka lah ban dei kaba shisha ne ka lah ban dei tang ki puriskam hynrei kaei kaba ngi sakhi mynta ka long ba ngi dei shisha ki jaitbynriew ba dang ai jait sha ka kynthei kumba long lem kiwei ki kynhun jaitbynriew na jaitbynriew Minangkabau kiba shong bas ah ha ri Indonesia, Akan na ri Ghana, Bamenda na ri Cameroon, Batek na ri Malaysia, Bontoc na Philippines, Bayowa na Papua New Guinea, Bribri na Costa Rica, Hopi na USA, Karen na Burma, Kuna na Panama, Mosuo na China, Navajo na USA, Alor na Indonesia, Kerinci na ri Indonesia bad kiwei kiwei de. Kine ki dei ki jaitbynriew ritpaid ha kylleng sawdong ki ri jong ka pyrthei kiba ai jait kmie kum mangi ki Khasi, Jaintia bad ki Garo. Ngim sah marwei ha ka jingai jait sha ka kmie hynrei ki dang donkiwei ruh ki jaitbynriew kiba dang long lemkum mangi.

Ka jingkwah ai jait kpa kaba ngi iohi mynta:

Man la u/ka briew ki don la ki jingkwah bad ka jingkwah jongngi shimet ngim dei pat ban pynbor ia kiwei ban bud ia kaei bangi kwah. Kumjuh ruh ha ka jingkwahjong ki katto katne ki rang jongngi ban shim jait shalade, kane kam dei ka jingkwah khyllah jong ki hynrei ki don la ki jingpyrkhat babha n aka bynta ka lawei ka patengjong u symbai jongki. Hanga shi met ngam da khuslai jait kynthei ne jait shynrang kaba nga I donkam shimet ka dei ka jingia bha shi kmie shi kpa lem bad ki khun. Ka jingkwah jongnga ka dei ban iohi ba man la iwei pa iwei I khynnah rit I sah ryngkat bad ki kmie ki kpa lait noh tang haba U Blei u ibit ban shim noh ia  I kmie lane u kpa jongka iing. Lada ngi phai sha ka ban ai jait noh na u shynrang ruh ka biang hi tangba ngin bud dien pat kumno ia ka jait ka khong ki kparad miaw parad khnai jong ki kpa jongngi? Katno ngut na ngi ki ban tip ia ka jait bad ka kyrteng jong I parad jong I parad jongngi? Lada ngi tip eh ruh ngin tip eh tang haduh lai pateng bun napdeng jongngi ngin ym tip satia ia ka kyrteng I parad/paieit jong I pa jongngi. Sa kawei pat khlem pep ki jingkulmar kin sa mih hadien habud. Bad ka jingkylli kaba mih ka long iano ngin khot Kur bad iano ngin khot kha?

Ka Bhah ka bynta n aka bynta ki khun kynthei bad ki khun shynrang:

Kane ruh ka dei kawei na ki ishu kiba ki khun samla internet jongngi ki ia ud ia nam bha. Nga shi met nga dei ba wan n aka longing longsem ba duk bad ki kmie ki kpa jongngi naduh ba sdang ki sneng iangi ki khun shynrang bad kynthei ban minot thop ha ki jingpule namar ba kim don spah don hajar ban ai hangi. Ngi ialeh shitom shisha bad ngi ioh ban pynurlong ia ka spah ka hajar kaba ki kmie ki kpa ki la dep pynlut n aka bynta ki jingpule jongngi bad nalor kaba ki la dep pynlut sa kaei pat ngi dang kwah? Ki don bun ki paralok jongnga na ki thain Riwar kiba ki khun shynrang ki ioh bynta lem mar kawei ne ar ki bri. Ki don ki jaka ha ki thain war ba ki ai bhah ia ki khun shynrang  ha kaba ma u bad ki khun jong u ki lah ban bam katba ki mon ha ka por ba u dang im bad ki khun ki hap ban pynphai noh ia ka bri hadien ba u kpa u lah khlad sha ki kha. Ki don pat ki kha ba bha kiba don ka mynsiem sngewlem ki shah ban bam ki khun u hymmen ne u knii ia ka bri kaba dei ka nongkynti jong ki.  Ki don ki rangbah kiba shalak haba ki ioh bynta lem na iingkur ki trei shitom ban rep ban riang ha ka bri kaba ki ioh bad hadien ba ki ioh ban die ia ki soh ki pai ba mih n aka bri ki sa thied jaka puta ia ki khun pat namar ki tip b aka jaka ba ki ioh na ki kur kan leitphai sha ki kur namar ka dei ka bri iing kur. Ki don ki rangbah bymiohi jngai pat haba ki ioh ban bam ia ka bri na iing kur kimtreh ban rep ban riang namar ki ong kan sa leit phai sha iing kur da kim don shuh. Kumta ki khun ki kti jong ki rangbah kiba don kum kine ki jait jingpyrkhat ki kham kyrduh bad kham shitom ha ka ioh ka kot laitnoh lada ki trei shitom hi da la heh la san. Ki don ruh byllai ki kmie ki kpa bapli bymdon eiei ban ai ia ki khun la ka long ia ki khun kynthei ne ki khun shynrang la ha kaba phah skul ban pynnang pynstad ne wat ban ai seng ia ki khun ki kti namar wat lada ki kwah ban iarap makna kim kotbor satia ban leh ia kata namar ba ban ka duk ka shitom hato ngin dawai bai seng kumno kein na ki? Ki don ki khunswet ki bymdon eiei hynrei lyngba ka jingtrei shitom jong ki ki kiew ha ka ioh ka kot bad ki jingdon jingem. Kumta ka jingioh bynta ne bymioh  bynta khlem ka jingtrei shitom ngin iai im duk im jynjar hi ha ka ioh ka kot. Kumta nga kyntu ia phi ki samla shynrang ki samla kynthei ban trei shitom bad ban nym lehrain haba phi trei hok ia kano kano ka kam. Lada phi dei kiba donbok ban ia ioh bynta lem na ki kmie ki kpa khlem ka jingtrei shitom jongphi hi kan shu long lehnohei ka jingioh bynta jongphi. Lada phi wan n aka iing bymioh bynta lem kum kiwei iengjoit kut jingmut bad trei shitom badphin hun jrut haba phi ioh phi kot n aka jingtrei shitom jongphi. Kynmaw ba ki rib a la iaid shaphrang ha ka pyrthei ki dei ki ri ha kaba ki khun kynthei ne khun shynrang kim khmih lynti ban ioh pateng ia ka spah ka phew jong ki kmie ki kpa jong ki namar ki khun jong ki ri kiba la kiew ha ka roi ka par ki tang shu poi 18 snem shaneng ki hap ban mih iing noh namar ki hap ban kit khlieh hi dalade ialade naduh ka bai sah bai bam bai skul da kaba trei bylla mynstep lane janmiet la ka long ha ki iing briew ne ha ki supermarket, sam kot khubor. Ymtang ba ki bylla hynrei ruh ki pule artad. Kumta lada kiwei ki kiew khlem ka jingioh pateng ia ka spah ki kmie ki kpa balei ngi ngim lah? Ka riewspah ka duk ka shong hangi hi ban jied. Kynthei ne shynrang kiba ioh pateng ia ka spah ruh to trei minot thop ban nang pynroi shuh ia kaba phi la ioh bad ki bymioh lad ban ioh pateng ruh trei shitom hi traitbad leh hok ha kano kano ka bynta kaba phi trei phin sa roi parum pareh. Hynrei lada phi shu shong jaipdeh ia kaba phi la ioh ruh phin sa duh noh. Kumta Samla ba dang pura nadong sha dong ieng joit ki lad ban kiew shaphrang ki bun lada phi don ka mon.

Ki daw ka jingiapait pra jong ki iing ki sem kim dei satia na ka rukom ai jait bad kam shong ruh ha ka kynthei marwei shimet ne ha u rangbah hynrei ka shong ha ki arngut shi lok, ka jingia burom ba markylliang, ka jingshaniah, ka jingiaieit iwei ia iwei. Kumjuh ruh ka jingbymioh bynta lem na ki kmie ki kpa kam dei ka daw kaba pynsah duk iangi namar ym baroh kiba riewspah kiba ioh bynta na ki kmie ki kpa bad kumjuh ruh ym baroh kiba duk kidei ki bymioh bynta na ki kmie ki kpa. Ki don kiba riewspah khlem da ioh bynta ioh bha na ki kmie ki kpa bad ki don kiba sah duk wat hadien ba ki ioh bynta na ki kmie ki kpa ruh.