3 tylli ki mat nga la leh, ka shong ha u paidbah, ong u MDC ka Nongthymmai

Shillong 14 Rymphang:
U MDC ka Nong thymmai u Bah Latiplang Kharkongor u la ong ba ha kine ki 10 snem ka jing long MDC jongu, ki don lai tylli kiba mat ba kong san kiba u la leh.
Ha ka jingiakren bad u Rupang ha kane ka sngi Thohdieng shwa ban leit sha ka jingiajied ha kane ka elekshon MDC mynta ka kynti, u Bah Latiplang u la ong ba ha kane ka elekshom MDC ka ban sa long shen ha ka 24 tarik Rymphang ka shong ha ka mon jong ki paidbah iano ba kin kyrshan ban long u Nongmihkhmat sha ka District Council. “Ha madan ngin iakhun, hynrei ka shnong ha u Paidbah ba un ai ka rai”, la ong u Kyrtong ka KHNAM na Nongthymmai.
“Nga la pynduh ia ka jingpynrung kyrteng ia ki shipai ha ka ban thep vote, nga la pynduh ia ka Panchayat ha Madanrting bad ka jingthmum jong ka sorkar ban pynngat sha ka Municipal ia ka thain Nongthymmai na la pynduh”, la ong u Bah Kharkongor.
U Bah Latiplang u la ong ba kum u MDC ha ki shiphew snem u la leh bun ki kam hynrei ka shnong ha ki paidbah ba kin bishar ia ki kam ba u la leh.
U Bah Kharkongor u la jop nyngkong ha u snem 2004 bad ha u 2009 na ka KHNAM, bad kane mynta ka dei ka sien ka ba lai ba yn iakhun biang na ka KHNAM.
Une u kyrtong jong ka KHNAM na Nongthymmai Konstiwensi u la ong ba la 25 snem mynta ka District Council kam pat lah ba leh eiei bad ka daw namar ba ha District Council la synshar da ka Congress ha kaba ki MDC ki long tang kum ki si sam khmut ha ka Party.
“Ki MDC Congress ki ieid ia ka Party ban ia ka jaidbynriew”,la ong Bah Kharkongor bad kane ka paw ha kaba ia ka Village Administration Bill kaba donkam kyrkieh ban pynkup bor ia kik Rangbah shnong la ar snem kam pat lah leh eiei katba ia ka Delimitation Bill tang hapoh shibnai ki la pas tang namar ba la hukum ki heh jong ka party.
“La 25 snem mynta ka District Council kam pat lah ban pas ia kano kano ka ain kum ka Land Bill, ka jingpynkylla ia ka Land Transfer Act bad kiwei ki ain kiba thmu ban pynthroin ia ka jiaidbynriew”, la ong u Bah Kharkongor bad u la bynrap ba kane baroh kadei namar ba ia ka EC hapoh District Council la synshar da ka party nongwei.
La ong ba ka District Council ka dei ka kam iing ha kaba ki nongmih khmat kidei ban thaw ia ka ain ban iada ia ka kyndew ka shyiap jong ka jaidbynriew bad ki paidbah ki dei ban tip shai ia ka jingmut jong ka District Council.
Katkum ka jingong u Kyrtong ka KHNAM ki paidbah trai jaka trai muluk ki ei ban jied ia ka party trai ri lum kaba ieng ban aida ia ka lok longtrai jong ki ym kum kiwei ki party kum ka Congress kaba shah synshar nabar. Ka nongthymmai Konstiwensi kan sakhi ia ka jingiakhun ha kane ka kynti kynthup ia u Bah Thedious na ka Congress, Bah Wanpli na UDP bad u Bah Vicky na ka Independent. Ka Nongthymmai kaba kynthup 18 shnong ka don 22 hajar vote.