Nongstoiñ: Ka kynhun ialehkai jong ka Marbisu SC kala ioh ban khur ia ka jingjop ha ka lympung 2nd Knock Out Football Tournament 2018-19 bala pyniaid da ka New Nongstoiñ Sport Social & Cultural Club (NNSSCC).
Katei ka jingjop jong ka Marbisu SC kala wan hadien ba kala lah ban pynliem noh ia ka kynhun ialehkai jong ka Nongstoiñ FT da 2 kol la 1 kol ha ka jingiakhun kaba la long ha ka sngi Nyngkong jong ka taiew ha ka madan ialehkai jong ka New Nongstoiñ.
U Macdonald Kharbuki jong ka Marbisu u bala ioh ban khur ia ka nam Man of the Match.
Haba phai sha katei ka jingiakhun kaba la long hadpeng kitei ki ar tylli ki kynhun ka la long shisha ka jingialehkai kaba itynnad bha namar ka jinglah ban ia pashat bha ia ka bol da baroh ar kynhun bad kumjuh ruh ka jinglah jong ka Nongstoiñ FT ban ialehkai bha kala pynkmem ia kiba bun ki nongwan peitkai.
Haba sdang ka jingialehkai jong ka kylla step ka jingialehkai kala long kaba jwat bha namar ba baroh ar tylli ki kynhun kila ioh lad ban ia rah mar kylliang ia ka bol hynrei dei ha ka minit kaba 20 ba u Macdonald Kharbuki u rangialehkai khmat jong ka Marbisu u la ioh ban khalah da kaba tyngeh ia ka bol bad kala rung beit jlang shapoh ka kol bad lyngba katei ka 1 kol ka Marbisu kala ioh ban lam khmat ia ka jingialang.
Shuh shuh hadien katei ka jingshah thep kol ka Nongstoiñ FT ruh kala iakhun tyngeh ban ioh pynphai noh bad katei kala jia tang hadien shi minit ba kala shah thep kata ha ka minit kaba 21 kal ioh ban pyniakhaid noh ia katei ka shi kol ia kaba la ioh ban thep da u Sunshiness Dkhar bad da katei ka jingioh pynphai ki ar tylli ki kynhun kila don hapdeng ka jingiakhaid tad haduh ba kut noh ka kylla step.
Haba bteng pat sa ia ka jingialehkai ha ka kylla miet na ka liang jong ka Marbisu kala lah ban ialehkai khambha shuh shuh bad kala iakhun tyngeh ruh ban pynioh ia u nam tam ha kaba kala ioh ruh ia ki katto katne tylli ki kabu hynrei kitei ki kabu kila sepei lut namar ka jingtbit ki rangapdien ka Nongstoiñ hynrei kyndit kynsan ka Marbisu kala ioh ia ka kabu ksiar ban thepkol kata ha ka minit kaba 72 hadien ba u nongpyniaid u la rai ban ai da ka penalty hadien ba u rangapdien ka Nongstoiñ u la pynkyllon noh ia u rangialehkai ka Marbisu hapoh ka D Box katba u ba dang thmu ban thep kol.
Kumta lyngba katei ka kabu u juh u rangialehkai ka Marbisu u bala shah pynkyllon bad u ba la thep ruh ia ka kol kaba nyngkong u la shim ia katei ka kabu ksiar bad khlem da pynsepei ka bol ba u la shut kala rung beit jlang shapoh ka kol bad lyngba katei ka kol kaba kynsai jong u Macdonald Kharbuki ka Marbisu kala ioh syndon ban khur ia ka jingjop.
Ha katei ka sngi ia ka nam Man of the Match la ioh hi da u Macdonald Kharbuki jong ka Marbisu bad na ka liang jong ka NNSSCC kala pyntip ba ka jingialehkai ka ba bud kan long biang sa ha ka 13 tarik mynta u bnai ha kaba ka Mawlot FC kan iakhun pyrshah ia ka Khliehriat FC.