Ki nongrep slasha ka Assam mynta ka sngi, ki la pynrem tyngeh ia U Narendra Modi, myntri rangbahduh ka Ri, uba kam ialade ba u dei u nongdie sha, namar ba um shym la pyrkhat satia ban kyntiew noh ia ka bai bylla jong ki nongdie sha T.350 shisngi bad ki nongrep slasha, ki dawa ba dei ban kyntiew ia katei ka bai bylla ha shwa ba un sdang u snem thymmai.
Na ka liang jong U Rupesh Gowala, General Secretary jong ka Assam Chah Mazdoor Sangha (ACMS), ula kynthoh da kaba ong ba U Modi, u ju kam ialade, ba u dei u nongdie sha, hynrei um shym la leh eiei satia ia ki million ngut ki nongrep slasha ha kine ki saw snem ba u don ha ka Sorkar.
“Ha shwa ka elekshon Lok Sabbha ha u snem 2014, U Modi, ula kren ha shibun ki jingialang ha Assam, ha kaba ula kular ia ka bai bylla kaba T.350 shisngi” ong U Gowala. Haduh mynta ki nongtrei ha ki kper slasha ha ka them Brahmaputra, ha Assam, kiba don shiphew lak ngut, ki ioh T.167 ka bai bylla ha ka shisngi, katba kito kiba don ha ki them Barak, ki ioh T.145 shisngi. Katei ka dei ka dor, kaba la ia kut hapdeng ki nongtrei jong ki kper slasha bad ka sorkar Assam bad kan kut ha ka 31tarik Nohprah 2017. Ka sorkar Assam, ka thmu ban pynkiew dor da T.30 ha ka shisngi, tangba katei kan trei kam naduh ka 1tarik Lber 2018.
Ka Assam, ka don 800 tylli ki kper slasha kiba heh bad kiba rit bad ka pynmih slasha haduh 50 percent, na kaba la pynmih ha ka Ri hi baroh kawei.