Ki nongialam sengbhalang na Assam, ki la sdang ia ka jing shoh shah thngan naduh mynta ka sngi, kaba khlem buh por ban pynkut ha ka nongbah Delhi bad katei ka dei kum ka jingsngew pyrshah jongki, halor ka ain jong ka sorkar India, kaba ailad ia ki poiwir rit paid kiba wan na Bangladesh bad na kiwei ki ri, ba kin kylla long ki nong India lane kaba la tip, kum ka Citizenship (Amendment) Bill, 2016. La iathuh ba ki don 70 tylli ki seng bapher, kiba shim bynta, ha kaba la lamkhmat da ka Krishak Mukti Sangram Samittee (KMSS).
Kitei ki nongialam sengbhalang ki pynlong ia katei ka jingshong shah thngan jongki ha Jantar Matar, kaba jngai tang 3 kilometre na Parliament. Ka dorbar jong ka Parliament, ka sdang naduh ka 11tarik Nohprah 2018 bad kitei ki sengbhalang, ki thmu ban pynpaw sha ka dorbar bah jong ka Parliament, ba kim pdiang satia ia katei ka ain.
U Akhil Gogoi, nongialam ka KMSS, u ong “Katei ka ain, ka dei ka jingma kaba shyrkhei ia ka Assam bad lada pynlong ain ia ka, kan ktah jur ia ka jinglong kyrpang ki trai shnong ha Assam bad ka BJP, ka ialam bakla ia u paidlang ka Jylla, halor ka jingma ka ban mih na katei ka ain”.