U MLA ka Mairang u nang tang ban ai skhim shimet, ong u MDC

Shillong, 11 Rymphang:
U MDC ka Mairang u Bah Rasor Rani u la ong ba u MLA ka Mairang Bah Metbah Lyngdoh u la nang tang ban sam skhim shimet hynrei um shym la wanrah eiei ia ki kam pynroi sha ki paidbah bad ka thain.
“Ha ka jingiohi jong nga shimet, nga sngew ba u MLA ka Mairang u nang tang ban sam skhim shimet hynrei um nang ban wanrah ia ki kam pynroi sha ka thain”, la ong u Bah Rani haba kren mynta ka sngi sha u Rupang.
U Bah Rasor uba mihkhmat teng kum u MLA bad u MDC ka Mairang u la ong ba, watla um tip la ki paidbah ki ibit ne em hynrei ka jingiohi jongu, ka pynpaw ba u MLA u duna ha ka rukom ban wanrah ia ki kam pynroi ba iadei bad ki paidbah.
“Ha Mairang kim don ki skul ba biang, ki jaka sumar, ki madan ialehkai nalor kiwei pat kiba u MLA u dei ban shim ia ka jingkitkhlieh ban wanrah ia ki kam pynroi”, la ong u Bah Rani.
U la pynpaw ruh ia ka jingbymsngew iahap ia ka jinglong MLA bad MDC ha kajuh ka por namar ba kine baroh ar tylli ki kam, ki dei kiba khia.
“Lada u MLA u shah jied kum u MDC, kan don ka jingdkoh namar ba un hap ban pynleit jingmut ia baroh ar”, la ong u Bah Rani bad bynrap, ka kam MDC kam dei kaba sting hynrei ka dei kaba khia bad kaba donkam bha.