Shillong: Ka Dorbar Shnong Nongmensong kala pynhap pyrda noh da ka pynkut ia ka jingrakhe jubili ksiar jong ka hapdeng ka jingshongkun ryngkat ki rong ki rup.
U Myntri ka tnat ka Koit ka Khiah jong ka Sorkar Jylla u ba long ruh MLA jong ka thain, Bah A. L. Hek u la long kum ka kongsan ha kane ka sngi bad u Bah James Ban Basaiawmoit, MDC kum u symbud kongsan. Ha kane ka sngi la wan ban sakhi lang da U Syiem Hima Mylliem, Paiem Ainam Syiem, Rangbah Shnong Nongmensong, Bah B. Khonglah, nalor ki nongmihkhmat barim MLA bad MDC, Rangbah Shnong barim, ki nongkitkam Shnong naduh ki Rangbah ki samla bad ki longkmie kiba la wan ban sakhi ia kane ka jingrakhe.
Ha kane ka sngi la ioh ia ka jingplie ia u maw sah jingkynmaw ia ka jingrakhe bad ia ka thup sah jingkynmaw ka Souvenir jong ka jingiaid lynti ba san phew snem ka shnong da u Kongsan Bah A. L. Hek.
Ha kane ka sngi la pynkup burom ruh ia ki Rangbah Shnong barim bad ia ki nongkitkam ba mynta jong ka Shnong namar ka jingnoh synniang ba radbah ka jong ki sha ka kam synshar Shnong bad ka bha ka miat jong ka Shnong ka thaw.
La pynkup burom ruh ia ki samla jong ka Shnong kiba la jop ha ki jingialehkai bapher bapher ha ka National bad international competition.
Ha ka jingkren kum u kongsan, u Bah Hek u la ai khublei bad iaroh ia ka shnong ia ka jingkynjoh jong ka ia une u maw mer ba san phew snem, bad mait phang ba bun ki jingkylla kila urlong ha kine ki snem ha ka shnong.
Ha kane ka sngi la ioh ruh ia ka jingkren na u Bah James Ban Basaiawmoit, MDC, Paiem Ainam Syiem, Rangbah Shnong Nongmensong, Bah B. Khonglah.
Ha kane ka sngi la ioh ruh ia ka jingsam khusnam sha baroh ki nongjop ia ki jingialehkai bapher bapher bala pynlong na ka bynta kane ka jingrakhe.
La pyniphuh iphieng ia kane ka jingrakhe da ki jingrwai na ki nongkitkam Shnong, ki seng samla, seng kynthei, khynnah skul, ka jing pyni ia ki riam tynrai da ki longkmie, jingshad na ki khynnah skul bad samla jong ka Shnong.
Kum ban pynkynmaw ka shnong kala sdang ia kane ka jingrakhe ia ka jubili ksiar d naduhb u bnaio Naitung mynta u snem da kiba bun ki prokram ba pher ba pher hapoh une u snem, kiba kynthup ia ki jingkop rwai, shad, pyni riam, phutbol, kirket nalor kiwei kiwei ki jingialehkai bad ki prokram.
Ha kane ka sngi pynkut, la sam ruh ia ki khusnam sha ki nongjop kiba la shim bynta ha kitei ki prokram bad ki jingialehkai ba pher ba pher da kitei ki riew rangbah.