Nongstoiñ: Ka lympung kynjatbol kaba la tip ruh kum ka Rani Motors Knock out Football Tournament (RMKOFT) bala pyniaid da ka Laitkseh Sport Club (LSC) kala jam sa ah kawei pat ka wat kata ka quarter final bad ka jingiakhun quarter kaba nyngkong kan long mynta ka sngi hapdeng ka Ryntih SC pyrshah ia ka Nongkrem SC.
Katei ka jingiakhun quarter kaba nyngkong jong katei ka lympung ka ban long ruh hapdeng kitei ki ar tylli ki kynhun kan sdang ha kapor 1:30 PM ha ka madan Mawkynjoiñ Laitkseh bad kum ban shu pynkynmaw ba ka kynhun ialehkai jong ka Ryntih kadei kawei na ki kynhun kaba khlaiñ bor bha ha katei ka lympung mynta ka samoi.
Na ka liang jong ka Nongkrem ruh ka long ka kynhun kaba biang bor bha ban ia syrdoh reng ba ka Ryntih kumta la khmih lynti ruh ba katei ka jingiakhun quarter hapdeng kitei ki ar tylli ki kynhun kan long kaba itynnad bha.
Kumta na kaliang ka LSC ka ia wer ia baroh ki paidbah riew ieit phutball jong ka thaiñ bad na ki wei pat ki jaka ba kin wan ban sakhi biang dala ki jong ki khmat ia katei ka jingialehkai quarter kaba nyngkong.