Jowai: Mynta ka janmiet, la pynpait noh ia ki Tala ba la khang ka KSU ia ka karkhana pynmih Dewbilat Dalmia Cement kaba don ha Thangskai, East Jaintia Hills.
Ka KSU ka la leit khang tala mynhynnin ka sngi ia katei ka kharkhana pynmih dewbilat halor ka jingkynnoh ba ka la thok bad shukor ia ki briew jong ka thain.
U DC u la ai hukum ban pynpait noh ia ki tala bad u la phah ia u Magistor u bah Marwein ba leit sha Dalmia Cement ban weng noh lut ia baroh ki tala.
Halor kane ka jingleh u DC, ka KSU ka la bitar tyngeh bad ka la buh jingkylli ba hato u DC u lah ne em ban siew ia ka pisa jong uwei u briew ia kaba katei ka company ka la bam klop.“Katno katei ka Company ka la siew ia u DC, bad hato une u DC u kwah ne em ba ngin ia poi sha ka jingiabha ia miat, ne u kwah ba ngin ia um snam ne”, la ong u Fenry Khonglah, uba dei ruh u paralok u ma B Bareh u ba la shah thok haduh palat 2 klur 67 lakh tyngka lyngba 3342 tylli ki kot shallan khaii dewiong ha katei ka Company.
Ka KSU ka la leit khang tala ia katei ka kharkhana hadien ba uwei u rangbah u la wan ban ujor ba katei ka company kam shym la siew satia ia katei ka pisa bai shallan kaba la kot da ki klur tyngka.
“Ngi nym aili ia katei ka Company ban bam ei ia ka syep jong ki paradoh para snam jong ngi. Ngi dang kmih lynti ba katei ka Company kan ai kam ai jam ia ki paradoh parasnam jong ngi, hynrei ka la kjit pynban ia ka spah ka phew ka jong ngi, ngin nym aili bad ngin ialeh da kaba tyngeh wat lada ngi hap ban ia unsnam ruh”, la ong u President ka KSU, u ma Ohibait Dkhar.
Haba iakren bad u bah SS Syiemlieh- uwei na ki Magistor, u la iathuh ba mynta ka sngi u DC u la khot ia u ma Basterwel Bareh bad ia ka kynhun jong u ban pan jingpynshai na ki, halor ka jingshah khang tala ia katei ka Kharkhana Dewbilat.
Dei hadien kane ka jingiakren bad kitei ki trai shalan ba u DC u la phah ia u Magistor jong u ban leit plie noh ia ki tala ba khang ia katei ka Company.
“Ngim shym la iakren bad u DC ban ai kano kano ka jingmynjur ba u DC un ai hukum ban plie ia ki Tala, ngi la wan tang ban pynshai ha khmat u DC”, la ong u samla Fenry Khonglah.Kane ka jingleh u DC ka paw shai ba u la ioh kamai bun na katei ka Company, la bynrap u samla Khonglah.
Shuh shuh na ka liang u DC u la rai ban khot iakren ia baroh arliang mamla ha ka 11 tarik une u bnai katba na kaliang jong ka KSU bad u trai uba dei ban ioh haduh 1.67 klur na katei ka Company, u ong ba katei ka Company ka dei ban siew ia katei ka pisa kaba dei ka hok jong u paradoh parasnam lym kumta, ka seng kan iaid shakhmat da kaba kham tyngeh.