Ujor ki nongshong shnong ka Khliehtyrshi, ia u CEM ka JHADC

Shillong, 10 Rymphang:
Lai ngut ki nong shong shnong ka Khliehtyrshi kaba hap ha Jowai Doloiship, ki la ujor FIR pyrshah ia u Chief Executive Member (CEM) ka JHADC u Bah Madonbai Rymbai, bad lai ngut kiwei pat halor ka jingkynnoh ba ki donkti ban rejister tuh ia ka jaka jong ka shnong bad sei tuh ruh ia ka pisa jong ka shnong haduh T. 1,15,05947.60 kaba dei ka bai buria ia ka jaka na ka ophis u Deputy Commissioner ka East Jaintia Hills.
Ki lai ngut kiba ujor FIR kynthup Bah Deimon Phawa, Kong Arlin Dkhar bad Kong Friday Sana ki la kynnoh ba u Bah Madanbai, lem bad lai ngut kiwei kynthup u Kitbok Rymbai, Emdor Rymbai bad u Dr W Ryngkhlem ki la leh thok bad thaw sop sop ia ka rai jong ka Executive Committee tang lai ngut khlem ka jingtip jong ki paidbah bad ka dorbar shnong. “Ki la thaw thok ia ka dulir khyndew jong ka shnong sha ka kyrteng jong u Bah Madonbai bad ki la sei ia ka pisa na ka bai buria ia ka jaka jong ka shnong kaba la kot sha ka T. 1,15,05947.60”, la kynoh kine kiba ujor FIR.
Kine lai ngut haba kren mynta ka sngi, hha ki nongthoh khubor ha Shillong Press Club, ki la kynnoh ba ki la rejister sop sop ia katei ka jaka jong ka shnong ha Lumpohsiej kaba don ha Khliehtyrshi kaba dei ka jaka jong ka shnong. Ia katei ka jaka bah eh 34270.00 sq. mtr la shim da ka sorkar ban shna surok.
“Ngim bna ei ei bad ngim tip eiei ia ka jingleh sop sop jongki ia katei ka jaka naduh u snem 2010 hynrei dei hadien ba la pan jingtip da ka RTI ba sa tip ia kane kam beain jongki”, la kynnoh u Bah Phawa uwei na kine kiba ujor FIR.
U la bynrap, “Na ka liang ka shnong ka la dep khot ia ki ban wan pynshai halor kane ka jingleh jongki, hynrei kim shym la wan bad hadien kane, ki paidbah nongshong shnong kim banse ban wad da kawei ka lynti.
“Ngim ju bnai don pisa katno ka shnong ha bank, namar ba la leh bad pyniaid donbor da kitei ki briew”, la kynnoh ka Kong Dkhar bad bynrap.
“Ngi la pan jingshai na kitei ki briew ha ki kot khubor katkum ka jinglap ha ka RTI na ka ophis u DC ka Revenue Jowai, hynrei kim long kiba biang.
Halor kane, ki la dawa ba ki pulit ki dei ban leh mardor ia ki briew kiba donkti ha kane ka kam ban pynshitom katkum ka ain. Ki la dawa ruh ba dei ban aiti ia kane kam sha ka tnad CBI ban pynlong ia ka jingtohkit khnang ba ki runar kin shah trei ha ka kti jong ka ain katkum ka jingleh jongki.