Yn jop biang ka Congress na Langrin, ong U bah John

Shillong, 10 Rymphang:
Ka jingialang jong ka Langrin Block Congress Committee, kaba la long ha Shnong Rangthong, South West Khasi Hills District, ha ka 6 tarik Rymphang, ka la long kaba shongshit bha, ha kaba kiba bun ngut ki riewkhmat ki rangbah, longkmie jong ka Langrin MDC Constituency, ki la poi ban pynpaw ia ka jingkyrshan ba radbah ia u kyrtong jong ka seng Congress u Bah Mansturdy Nongrem, MDC, KHADC, bad bad ha katei ka jingialang baroh ki la kren skhem ba ki paidbah kin jied biang ia u MDC uba mynta namar ki don ka jingiatreilang kaba jan bad kaba ryntih bad u Bah Martin M Dango, MLA ka Langrin Constituency na ka seng Congress uba mynta.
Ha ba kren ha katei ka jingialang, u Bah John F Kharshiing, Vice-President, East Khasi Hills District Congress Committee, u la ong ba ka dei tang ka Seng Congress kaba lah ban ai ki Sorkar bad ka jingsynshar kaba skhem bad kaba iaineh baroh san snem. Katba kiwei ki seng jylla (State Parties) ki long kiba tlot bad kim kot bor ban pyniaid lane ban ai ka jingsynshar kaba skhem bad bun sien kiba bun ki Sorkar bad ki Executive Committee ba la ialam da ki Seng Riewlum ki neh tang khyndiat por hapoh Secretariat, KHADC bad JHADC.
U la ong ba ka jaidbynriew Khasi, Jaintia bad Garo ngi long kiba rit haduh palat lada ia thew bad kiwei ki jaidbynriew. bad ha kum kane ka por ha kaba ka don ka jingpynkhreh ban pynbeit thymmai ia ka Sixth Schedule ka long kaba donkam bha ban ioh ia ka Executive Committee, jong ka Khasi, bad Jaintia Hills District Council kaba don ha ka juh ka jingmut jingpyrkhat bad ka seng kaba don ha ka Sorkar Jylla khnang ba ki jingpyrshang ban pynbeit ia ki Sixth Schedule kin iaid beit iaid ryntih.
Haba u Bah John F Kharshiing, u la sngap bad iohsngew ia ka kaiphod na kylleng ka Langrin Constituency, u la ong ba mynta ka kynti la nang tikna ba u Bah Mansturdy Nongrem , un sa wanphai biang kum u MDC uba ioh ia ka nam jop bad uban sa ioh ia ka jingshahniah kaba bun tam ha kane ka MDC Election 2014.
U la ong ba Ka Seng UDP, HSPDP, ba pyrshah ia ka seng congress Ki ia shong Lang hapoh khadc.