Kyndit U Mukul ba ai kam khun lajong

Shillong,10 Rymphang:
U Myntri Rangbahka jylla u Dr.Mukul Sangma u la kyndit thret ban iohi ha ki khubor ba ar ngut ki kiba la ioh kam hikai bad kiba la shah thung kum ki ‘’ Assistant Mistress’ ha Pine Mount School ki dei ki khun jong ki heh ophisar ka tnad pule puthi kaba ia ka interview ruh la shim hi da ma ki.
“Ngan wad ia ki jingshisha na ki para nongtrei jong nga, u symbud Myntri Rangbah uba dei peit ia ka tnad pule puthi bad lada ka dei ne em ka jingshisha kumba la paw ha ki khubor’ ong u Dr.Mukul na Delhi haba ia kren bad uwei na ki nongthohkhubor lyngba ka phone, bad u la ong ruh ba lada ka dei ka jingshisha yn shim ia ka rai kumno ban pynshitom ia ki.
U Dr.Mukul ha ka juh ka por , u la pynpaw ia ka jingsngewkhia halor ka jingdonkti u Director of Higher and Technical Education, u CCM Mihsil bad u joint director jong katei ka juh ka tnad u ban sa shong thait noh haba kut u ne u bnai, halor ka jingkynnoh ba ki donkti ban thung kam ia ki khun lajong. ‘ ka dei ka jingialam bakla’ ong u Dr.Mukul uba ban biang ba lada ki khun jong ki ki ia khun na ka bynta ka kam kim dei shuh ban long ki nongshim interview.
Lah ban kdew ba ki la don haduh 77 ngut ki kandidet kiba la wan sha ka interview kaba la long naduh ka 8 haduh ka 10 tarik u kyllalyngkot 2014, bad na kitei kiba la wan interview tang ar ngut kiba la ioh bad kita ki dei ki khun jong ki ar ngut ki heh ophisar ka tnad pule.