Ba suki ka NHAI, hiar jurip u Ma Sniawbha ia ka surok Jaintia

Jowai,7 Rymphang:
Na ka por sha ka por, ki paidbah ka thain Jaintia ki la ud bad khnium bad ki sengbhalang ki la pynlong ruh da ki jingiakhih namar ka jingsniew palat ka surok jong katei ka thain, halor katei ka jingeh ba ki paidbah ki la pynpaw bad kumta u Myntri ba dei peit ia ka tnad PWD u Ma sniawbhalang Dhar mynta ka sngi dalade hi u la hiar sha katei ka thain ban leit jurip ia ka jinglong jingman ka surok. Ha katei ka jingleit jurip u Ma sniaw u la hiar ryngkat bad u bah M.M.Sun Secretary PWD (R&B),u bah L Passah C.E.NH,PWD (R) ki briew jong ka NHAI u Col.Rajiv Malhotra Project Director NHAI,u T .Kamki, Manager (Tech) NHAI , bad ki la leit ban jurip ia ka surok naduh Mihmyntdu Jowai shaduh Malidhar. Katei ka jingleit jurip ka long ruh shi bynta ban peit la katei ka surok ka don jingeh ne-em ia ka kompeni ban pyntrei ia ka kam.
Haba ia kren bad u rupang u Ma sniaw u la ong ba ha ka jingshisha kam da donkam shuh ia u kum u Myntri ka tnad PWD ban leit jngoh ne leit peit ia katei ka surok namar ba la dep ban aiti sha ka National Highway Authority of India,ka NHAI ka la shimti ban pyntrei ia katei ka surok naduh ka 10 tarik u Kyllalyngkot 2014 bad ka la kular ban sdang noh ban trei mar pynban haduh mynta ka sngi ym pat iohi dak khyndiat ruh, dei na katei ka daw ba u Ma Sniawbhalang u la hiar dalade hi.
“Ka jingwan jurip ka jong ngi mynta ka sngi ka long ba ka NHAI kaba la aiti sha ka company Simpex Infrastructure Ltd ban pyntrei ia kane ka surok ka suki palat ban pyntrei wad lada ka la shimti ia ka kam naduh ka 10 tarik u Kyllalyngkot 2014 mynta la shibnai ngim iohi eiei dak eiei, nga kum u myntri ka tnad PWD nga la lap da la ki jong ki khmat ba bun ki bynta jong ka surok ki la jot shaba palat kiba sa tang katto katne por kim longshuh ban iaid kali, ka NHAI ka dei ban pyntrei noh wut wut ia kane ka surok khnang ba kan pynsuk ia ka leit kawan u paitbah” ong u Ma sniawbhalang dhar.
Na ka liang u Col Rajiv Malhotra Project Director NHAI u la ong ba kam don jingeh ne ka jingthud ia ka kompeni ban pyntrei ia katei ka surok , bad ka daw ka dei tang na ka jingsahteng kiwei pat ki kam baka Simpex Infrastructure Ltd ka pyntrei bad ka pan por lai bnai bad kan sdang ia ka kam hadien ba ka la pyndep shawei bad shen kan sa wanrah ia ki tiar ki tar bad ki bor mashin bad ka la kular ban pyndep ia katei ka kam hapoh lai snem.