Shillong: Namar ka jingiai mih ki khubor ba ka Um kaba sam na Mawphlang sha sor Shillong ka dei kaba lati bad ka bym khuid ban dih, u MLA ka Mawphlang konstitwensi u bah S.K Sun u la ong ba u sngew lehraiñ bha bad u sngew rem ruh ialade kum u MLA jong ka Mawphlang bad kumjuh ruh kum u Chief Engineer ba la shongthait jong ka PHE. Namar katei ka jingsngewrem halor ka jingiai mih khubor kaba la hap ban tuklar ruh da ka ing bishar, u bah S.K Sun u la ong ba u la pynbeit bad ki bor jong ka PHE ban ia leit jurip ryngkat bad ban peit kaei ka jingbakla bad dei ha ka sngi saitjaiñ jong ka taiew ka 1 tarik u Nohprah ba u bah S.K Sun u la hiar sha Dam Mawphlang bad kumjuh ruh sha jaka pynlang um ha Maw phlang (Treatment Plant) ban peit ia ka jinglong jingman ka Um bad kumjuh ia ka rukom pyntreikam ia ka GSWS Water Work Phase I bad Phase II kumjuh ka Phase III kaba dang iaid.
U bah S.K Sun uba dang sei ia ki jingdro lajong ban pyni sha ki Engineer bad ka kompeni ia ka rukom pyntrei ia ka GSWS Water Phase I bad Phase II bad ka Phase III kaba dang iaid ha Mawphlang(haneng) ka jaka thew Um.
Haba u la jurip ia ka rukom treikam ha Mawphlang u bah S.K Sun u la thalaiñ ia ki Engineer ka PHE kiba donlang ha katei ka sngi hapoh ka jingialam jong u Chief Engineer u bah S.K Blah bad u la thalaiñ ruh ia ka M/S Tantia Construction Limited kaba dei ka kompeni kaba pyntrei ia ka Projek GSWS. Ka jingthalaiñ u bah S.K Sun ka dei namar ba u lap ba ki rukom treikam hangtei kim shym la iaid beit katkum ki jingpruid dak jong u ha ka por ba u dang long u Chief Engineer hynrei la pynkylla da kumwei pat. Ha katei ka sngi u sei ia ki Drawing kiba u la pynkhreh dalade hi bad u la ai sha ka kompeni ryngkat ka jingmaham ba ki dei ban khynra lut ia ki kam ba ki la trei hynrei ki dei ban bud ia katei ka jingdro jong u bad u la maham ruh ba lada u lap ba kim shym bud ia kaei kaba u la batai un ym map satia ia ki.
“Da ki phew snem, nga la don hangne ha Mawphlang, naduh ka por ba nga long Asstn.Engineer, Executive Engineer, Addl. Chief Engineer bad Chief Engineer, nga tip lut nadong shadong shaphang ka Projek ha Mawphlang, nga tip ruh kaei kaba dei ban leh hangne.Hadien ba nga la shongthait ym don ba wan pan jingmut na nga, nga tip ba ki don ki briew kiba khang ia ki ophisar jong ka PHE ban pan jingmut na nga, hynrei mynta hadien ba nga la jop ia ka elekshon, nga don ka hok ban tuklar kum u MLA jong ka Mawphlang bad nga dei ruh u bynta jong ka sorkar” ong u bah S.K Sun uba la batai bniah ia ki jnit ki jnat kiba ia dei bad katei ka Projek ha Mawphlang.
U la pynkynmaw ba ia ka Projek ha Mawphlang la ioh ia ka mang tyngka lyngba ka JNNURM T.193.79 klur tyngka na ka bynta ban bujli ia ki paip um baroh hynrei haduh mynta ym pat lah ban pyndep ia kane ka kam. Ka kompeni Tantia Construction Limited ka la kam ba ka don ka jingwit ha kaba ia dei bad ki jaka ha Lad Mawreng bad ha Cantonment Area. Hynrei u bah Sun u la thalaiñ kylla ia katei ka daw jong ki bad u la ong ba haba ia kynduh jingeh ha ka jaka ki dei ban pyntip sha u ba un leh ia kaba donkam. “Ka Mawreng, ka Lad Mawreng ka dei ka konstitwensi jong nga balei phim pyntip ba ngan leh ia kaba donkam, balei phim pyntip ba ka don jingeh ha Cantonment Area, ngan leh ia kaba donkam” ong u bah Sun.
U bah Sun u la ong ba ka jingleit jurip jong u ka dei ban pynbeit ia ki kam kiba lait bad ban ia kren kumno ban pynbha ia ka rukom treikam ka jaka sam Um na Mawphlang. “Nga tip lut baroh shaphang ka Um ha Mawphlang, nga wan ban ia syllok bad phi kumno ban pynioh ia ki paidbah ka um kaba khuid bad kaba bit ban dih, nga la sngewlehraiñ ba ka Mawphlang ka shah kynnoh” u la ong. Ha kate ika jingleit jurip u la wanrah ia ki tiar ki tar bad ki jingdro ban pyni ba ka kompeni ka dei ban leh kumba u la batai.
Nalor katei u bah Sun u la ong ba ki don ruh ki jingduna kiba bun ha katei ka Water Treatment Plan kaba don ha Mawphlang kaba ym dei ban kynnoh tang ia ki nongtrei, “Hynrei kaei kaba nga sngew dom ka long ba kim iathuh hok ia kaei kaba jia hangne, nga tip ha Kashari kumno ki jubab, balei phin lehraiñ iathuh hok ia kaba dei, wat lehraiñ” ong u bah Sun ia ki Engineer ka PHE. La lap ba ha Mawphlang ba bun tylli ki kor ki ban thew ia ka jingkhuid jong ka Um ba ki la duh lut bad la hap ban shu antad shuwa ban pyllait um sha ki paidbah.