Nongstoiñ: Ka kynhun ialehkai jong ka Kith United Fc na West Khasi Hills kala ioh ban khur ia ka jingjop kaba nyngkong eh jong ka lympung kynjatbol kaba la tip kum ka 2nd Invitation Knock out Football Tournament bala pyniaid da ka New Nongstoiñ Sport Social & Cultural Club (NNSSCC).
U-Samson-Nongrum-(rong-iong)-jong-ka-Kith-United-u-ba-dang-pyrshangban-thep-kol-ha-ka–lumpung-kynjatbol-ha-New-Nongstoiñ.
Katei ka jinglah jong ka Kith United ban khur ia katei ka jingjop kadei hadien ba kala lah ban pynliem noh ia ka kynhun ialehkai jong ka Nongkrem SC da 7 kol la 0 ha ka jingiakhun kaba la long hynnin ka sngi ha ka madan ialehkai jong ka New Nongstoiñ.
Haba phai sha katei ka jingialehkai kaba la long hapdeng jong kitei ki ar tylli ki kynhun kala long ka jingialehkai kaba la kham noh shiliang namar ka jingkhlaiñ bor jong kawei na kitei ki kynhun kaba long ka Kith United ha kaba tang ha ka kylla step jong ka jingialehkai kala ioh ban thep haduh 3 tylli ki kol ia kaba la ioh ban thep da u Samson Nongrum ha ka minit kaba 3 bad 37, bad ruh da u Milancy Khongstia ha ka minit kaba 32.
Ym lah ban len ba watla ka Nongkrem kala shah thep haduh 3 tylli ki kol ha ka kylla step hynrei kila pyni ia ka sur ialehkai kaba itynnad bad da ka mynsiem jong ka jingiakhun da ka jingap khmih lynti ba kin sa ioh pat ban pynphai ia kitei ki kol hynrei sniewbok ba na ka liang jong ka Nongkrem kam shymla ioh lad ban pynphai ia kitei ki kol watla kala ioh ia ki katto katne tylli ki kabu thep kol.
Shuh shuh hababteng biang ia ka jingiakhun sa ha ka kylla miet na ka liang jong ka Nongkrem kala ialehkai bha hynrei ki rap ap dieng kim shymla lah ban tehlakam bha ha kaba ki rang ialehkai khmat jong ka Kith United kila ioh biang ia shibun tylli ki kabu thep kol bad khlem da pynsep ei ia kitei ki kabu ka Kith kala ioh biang ban thep sa ia 4 tylli ki kol ia kaba la ioh biang ban thep da u Samson Nongrum ha ka minit kaba 58, u Pynbha Marngar haka minit kaba 62 bad 74 bad ruh u Atlanson Kharmaw ha ka minit kaba 75
Na ka liang jong ka Nongkrem watla kala ialeh katlah kat iai ban ioh thep kol hynrei kam shymla iohlad satia bad tad haduh ban da kut noh ka jingialehkai kala hap ban mad syndon ia ka nam rem da 7 kol la 0 bad ha katei ka sngi ia ka nam Man of the Match la ioh ban khur da u Samson Nongrum jong ka Kith United u bala ioh ban thep haduh 3 tylli ki kol marwei.
Ka jingiakhun ka ban bud jong katei ka lympung kan long biang sa ha ka 3 tarik mynta u bnai ha kaba ka kynhun ialehkai jong ka MLT FT kan iakynduh pyrshah ia ka kynhun ialehkai jong ka Nongdaju bad katei ka jingialehkai kana sdang hi ha kapor 1:30 noh sngi ha katei kajuh hi ka madan.