Shillong: Ka Indian Oil Corporation Limited (IOCL), Bharat Petroleum Corporation Ltd (BPCL) bad ka Hindustan Petroleum Corporation Ltd (HPCL) kiba dei ki Public Sector Undertaking (PSU) kin pyntreikam da ka rukom kaba thymmai ban jied ia ki nongsam petrol ia ki jaka sam petrol thymmai ne retail outlets ha kane ka jylla da kaba shu khalai nusip, ym shu kum mynshwa da kaba shu jied.
Mynta u snem, ka IOC ka la buh thong ban plie thymmai 233 tylli ki petrol pump kynthup ha sor bad ha jaka nongkyndong.
Haba kren sha ki nongthoh khubor mynta ka sngi ha Shillong, u Deputy General Manager, u K Mohan (Retail Sales), u la pynbna paidbah ba ka jylla Meghalaya kan sa ioh 233 tylli ki petrol pump thymmai bad kiba kwah ki lah ban aplai noh naduh mynta ka sngi.
“Ngi la buh thong ban plie ia 233 tylli ki petrol pump ha Meghalaya kynthup 199 tylli kin don ha ki surok bah National High Way bad 34 tylli sha ki shnong nongkyndong”, la ong u Mohan.
La iathuh ba ki la poi sha kane ka jingkhein hadien ba ki la dep ban pynlong ia ka jingjurip kaba la neh haduh hynriew bnai lynter.
Ka jingkhot aplikeshon ban buh petrol pum ha Meghalaya kaba khatduh eh dei ha u snem 2014 bad mynta ha dien saw snem la khot biang.
La iathuh ba ha ka jingjurip la shem ba ka jylla Meghalaya ka don don kam 360 tylli ki petrol pump thymmai hynrei ha dien ba la bishar bniah la rai ban plie thymmai 233 tylli.
U Deputy General Manager u la ong ba la don kiba kwah ban buh petrol pump ha kane ka jylla Meghalaya ki lah ban aplai noh naduh mynta ka sngi da kaba leit sha ka website www.petrolpumpdealerchayan.in ban ioh ia ka jingtip kaba bniah.
“Ka rukom ia ki nongioh ban pyniaid ia ki petrol pump ha kane ka kynti kaba mynta kan long kaba khuid kaba suba bad kan long da kaba pynkhalai nusip kat uba don bok un ioh”, la ong u Mohan.
U Mohan u la ong ba ka jingplie shuh ia ki petrol pump kan ai kam ia ki briew ha kane ka jylla ha kaba kawei ka petrol pump kan ai kam hynriew ngut ki briew bad kane ka la iarap ha ka ioh kam ioh jam.
Na lai tylli ki kompeni sam umphniang jong ka sorkar pdeng kiba don ha ka Ri, la phiah ia ki 233 tylli sha ki lai tylli ki kompeni, ka Indian Oil Corporation Ltd kan don 87 ki petrol pump thymmai, na kine 74 tylli kin don ha ki NH bad 13 tylli sha ki nongkyndong, Bharat Petroleum Corporation Ltd kan don 113 ki petrol pump thymmai 96 ha ki NH bad 17 tylli sha ki nongkyndong, ka Hindustan Petroleum Corporation Ltd kan don 33 tylli ki petrol pump thymmai, 29 tylli ha ki NH bad 4 tylli ha ki nongkyndong.
Kiwei ki ophisar jong ka IOC kiba la ia don lang ha kane ka sngi ki long u Ashim Paul Chowdhury, manager retail sale jong ka IOC bad u Aloke Marandi Assistant manager retail sale ka IOC,ha kaba kine ruh kila kren sha ki lad pathai khubor.