Nongpoh: Ha kaba pynkut noh ia ka Inter Dong hapoh ka shnong Nongmawlong, ka Tyllilang ka la ioh ban rah ia ka namlahduh hadien ba ka la lah ban pynliem noh pyrshah ia ka Nangkiew Shaphrang da 7-6, ha ka jingiakhun kaba la poi shaduh ka jingiashut Tie Breaker.
Khyndiat haba phai sha katei ka phainal, ha ha kylla step jong ka jingiakhun dei ka Nangkiew Shaphrang kaba la ioh ban lamkhmat ia ka jingiakhun lyngba ka shikol na u Ionifast Nongbet ha ka minit ba 44 bad ki la pynkut ia ka kylla step da 1-0.
Haba la bteng ka kylla miet, ki rangialehkai ka Tyllilang ki la sei buit bad bor na ka bynta ban pynphai sha katei ka shikol kaba ki la shah thep bad khamtam eh ban iaknieh rah ia ka namlahduh, dei ha kaba kum katei ka por ka Nangkiew Shaphrang ka la ioh ia ka kabu kaba biang ban pynphai lyngba u Kyrshan Nongbet ha ka minit 65 bad pyniakhaid ia ka jingiakhun da 1-1.
Na ka bynta ka rai jop rai rem ia kitei ki kynhun, ki nongpyniaid ki la rah noh sha ka Tie Breaker bad dei hangtei ba ka Tyllilang ka la lah syndon ban pynliem ia ka Nangkiew Shaphrang da 7-6.
Ha kaba pynkut ia katei ka Inter Dong, la sakhi ruh da ka jingdon u Bah Jason Mawlong, MLA ka Umsning kum u kongsan, ha ryngkat u Bah Ecoles Wahlang, Rangbah shnong ka Nongmawlong lem bad kiwei kiwei ki riew rangbah jong katei ka thain bad ha katei ka sngi, na ka liang ka Nongmawlong Sports Club ka la pynkup burom ruh ia u Bah Jason Mawlong kum u MLA ba thymmai ka Umsning Constituency.