|
Shillong: Ka jingiakhun hapdeng ka Shillong Lajong FC bad ka Minerva Punjab ka la kut ha ka jingiakhaid mar 2 kol kaba long mynta ka sngi ha madan JN Stadium, Polo, Shillong.
Ha ka kylla miet, ka Minerva Punjab ka la hap ban ialehkai 10 ngut namar ba ka la bakla ban sei 6 ngut ki nongialehkai bar ri kaba long pyrshah ia ka ain bad ka hap ban pynshong noh uwei bad sah sa tang 10 ngut ha madan hynrei ka dang lah ban pyniakhaid. Ka jingiakhaid ka mut ba baroh ar liang, ki la hap ban iasam mar shi point na kane ka jingialehkai. Ka jingiakhaid ka la pynlong ruh ia ka Lajong ban kham jem mynsiem namar ba ka la kiew sha ka 4 point na ki 6 tylli ki jingialehkai haduh mynta katba ka Minerva ka la kamai 5 point na ki 5 sien ialehkai. Ha ka jingshisha, ka Lajong ka la lah ban kam trai ia ka jaka lajong ha kaba ka la ioh ban thep ia ka kol kaba nyngkong ha ka 24 minit lyngba u Phrangki Buam bad sa kawei, la pynbud sa u Allen Lyngdoh ha ka 43 minit. Baroh kin ear tylli ki kol, la thep ha ka kyllastep hynrei syndet syndet shwa ban wai ka kyllamiet, ka Minerva ka la ioh ban pynphai kylla kawei lyngba u William Opoku Asiedu ha ka 45+3 minit. Jin lada ka Lajong ka lah ban bat ia kane ka nam tam, ka la dei ban jop ha kane ka jingiakhun hynrei ha ka 75 minit, u Philip Njoku ka Minerva u la ioh ban pynkhih jar biang ia ka kynhun, ban pyniakhaid syndon 2-2 kol. Ka jingiakhun ka long kaba itynnad bha namar ba baroh ar liang mamla, ki la ialehkai bha hynrei lah ban ong ba ka jingbakla ka Lajong, kaba dei ban khur ia ka lai point, ka la pynduh nong ia ka, namar ba ha kaba kut ki la hap ban shu iasam mar kawei. Lah ban kdew ba ha ki jingialehkai lai tylli shabar na la iing, ka Lajong ka la shah pynliem lut ploin bad ka la jop tang shisien ha ka jingialehkai ha la iing bad ka rem shisien ha la iing. Ka la shah rem ha ka Indian Arrows, Gokulam Kerala bad ka Churchill Brothers Goa shabar na la iing bad ha la iing ka la shah rem ha ka East Bengal bad ka la jop tang shisien ia ka Aizawl ha ka iing. Ha kane ka kynti, ka Lajong ka la sei bad iasoi tang ia ki nongialehkai na ka ri bad kiba bun ki dei na kane ka thain mihngi hi khlem da wanrah nongialehkai nabar ri kumba long ha ki snem ba la dep hapoh ka jingialam u coach u bah Alison Kharsyntiew. U coach ka Lajong u la ong ba ka jingduna ka bor met bad ka rynieng haba ianujor bad ki nongialehkai, ka la donkam ia ki nongialehkai ban long kiba sted ha ka rukom ialehkai, namar katba nang suki kan pynioh kabu ia ki nongialehkai ba kham jrong. Ka Shillong Lajong kan iakhun sa ia ka Neroca FC ha ka 2 tarik Nohprah por 5 PM ha Shillong. |
