Hapdeng ki rai eh rai dam, jam ka Seng Khasi sha ka 119 snem

Shillong:  Ka Seng Khasi Kmie Shillong  ka la rakhe ia ka Seng Kut Snem kaba 119  mynta ka sngi ka 23 tarik u Naiwieng 2018 da kaba pynlong ia ka jingiaid paidbah na madan Iewrynghep, Laitumkhrah shaduh lumpung Weiking, ha Jaiaw.

                Ka Seng Khasi ka la lah ban jam ia ki shibun ki raieh raidam ha kine ki palat snem ban iakhun pyrshah ia ki bor kiba wan ban pynthame ban ialam sha ka jingbud tynneng ka jong kiwei.

                Ha kane ka jingiaiaid paidbah la wan sakhi da ki hajar ki riew seng na kylleng ka ri Khasi bad Jaintia ne ka Bri u Hynniewtrep, kiba la iaid kjat ryngkat ka put ka tem tynrai, ka phawar ka kynhoi.
Haba kren ha kane ka sngi, u Rgh Puramon Kynjing Dolloi Elaka Jowai, u la ong ba dei ban nym hun ka mynsiem tangba la don ha ka Seng Khasi hynrei dei ban pynjanai ia ki kam jongka.

                “Ka kam babha ba ki la aiti, dei ban pynjanai shuh ma ngi kiba bud nadien”, la ong u bah Puramon.

                Katba u Rgh. Synroplang Kharshiing u Asst. Secretary ka Seng Khasi Kmie, uba la pynpaw ba ka jingleit bud tynneng, ka dei ka jingbiej, da kaba u la kyntu ia ki riew seng ban long kiba skhem ha ka niam tynrai kumba la ai bynta u Blei Nongbuh Nongthaw najrong hatbian.

                U Bah Synroplang u la ong ba ka jingkhraw ka wan na ka jingkyrpang  bad ka jaitbynriew Khasi ka dei kaba kyrpang.

                “Kylli ka riti dustur, jubab ka niam, namar ba ka niam ka dei kaba im ha kaba ka jingngeit Blei ha u Khasi, ka la longdoh longsnam”, u la ong.

                La ioh ruh ia ka kaiphod na u General Secretary ka Seng u Rgh PD Nongrum bad ka jingkren pdiang sngewbha na u President u Rgh DK DKhar, ka jingrwai na ki tnad seng bapher bapher ban pyndonburom ia kane ka sngi.

                Shwa ia kane, ka jingrakhe la sdang da ka jingduwai kaban long haka por 8 baje mynstep ha Ïing Seng Mawkhar bad jingkyntiew ia ka Lama Seng.
Hadien kane kan don sa ka jingÏaid  Pyni Riti’ kaban sdang na madan Ïewrynghep haduh lympung Weiking Jaïaw kaban sdang naduh ka por 10 baje mynstep. La pynlong ia ka prokram ba kyrpang ha ka por 1 baje nohphai sngi ha Lympung Weiking, Jaïaw.
Nalor kata kan don ruh ka jingpynkup burom ïa ki khun samla kynthei bad shynrang kiba la pass bad wan shakhmat ha ki kyrdan pule bapher bapher.
Ka prokram ban pynkut ïa ka jingrakhe ïa ka Seng Kut Snem kin dei da ka jingïashim bynta ki khun samla kiban kiew rynsan ban ai ïa ka rwai ka siaw ka put ka tem bad phawar.
Hadien ba la dep na Madan weiking pat lah pynlong ia ka jingiaid sha ing seng ha Mawkhar ha ka por janmiet.