|
Ki jingduna ki skul bad ki College ha ki thain nongkyndong ka pynlong ia ki kmie ki kpa ban phah skul ia ki khun sha sor Shillong ynda haba ki dep ia ki jingpule na ki Primary skul hapoh shnong ba ki don. Kidon ki kmie ki kpa tang ban pynioh jingnang jingstad ia la ki khun ki kti ki durut ia u maw u dieng khnang ba ki khun kin long briew hadien habud. Ki khynnah skul ha ka rta ba dangrit bha ki hap ban mih na iing shabar ka jingkdup jong ki kmie ki kpa na ki hymmen bad para bad na ki paralok ruh kumjuh. Ki don ki khynnah nongkyndong kiba lah don bahaing lypa ha sor Shillong kumta ka kham suk ia ki ban wad jaka sah. Ki don ki kmie ki kpa ba khambit ka ioh ka kot ki phah sah Hostel noh ia ki khun jong ki. Don ruh ki kmie ki kpa kiba phah skul lut sha sor ia ki khun kumta kim banse ban wad jaka sah ha ki iingshongwai bad don ruh ki kmie ki kpa ki bymkot bor ban siew bai wai ne baibam ia ki khun ki kti jongki hynrei tangban ioh lem ia ki jingstad kum kiwei ki khun ki leit pule mynstep bad bylla katba shah ka kam ha ka por mynsngi. Katno ka jingitynnad ban iohi ba ki don ki khynnah skul kiba kyrshan dalade ialade ban ioh jingnang jingstad bad ki khynnah skul kiba pule mynstep bad trei mynsngi don napdeng jongki ba sah iingwai don pat kiba sah trei ha iing jong kiba ai kam ia ki.
1.Ka Jinglong jong ki nongai iingwai ha sor Shillong:
Kiba bun hi ki trai iing kiba aiwai dei kiba don ka mynsiem ba khim haba don ki khynnah skul kiba wad iingwai ki trai iing ki lah ai lupa ia ka jingmana bymdei ban khot sah ia ki bahaing ba wan itt dawai ne kiba wan donkam ha sor wat lada ka dei tang shi miet armiet ruh. Kaba mut ba ki khynnah ki dei ban mana lupa ia ki kmie ki kpa ba kim dei ban sah miet haba ki wan jngoh ne wan peit ia ki khun jong ki. Haba jia ka pang ka shitom pat ki bahaiing na nongkyndong kim banse ban kiew sha sor ban wad jingsumar namar bymdon doktor sha ki nongkyndong. Haba ki poi ha sor Shillong ki hap ap dawai da ki kynta teng2 katba kin ioh dawai lah shah ieh kali. Da ka jingbymbanse ki hap leit sah ha ki iingshongwai jong ki bahaing ba sah iingwai. Nga lah ju iohsngew ia ka jingshah kynhied ki nongshongwai haba ki don kiba haiing ba wan sah basa na ki trai iing bad katno ka long ka jingsngew pangnud ia ki nongkyndong bapli bymdon jaka rieh sha kiwei pat ki jaka. Ki don ruh ki trai iing ba beh iing syndon ruh. Hooid napdeng ki trai iing ba daini ba bun don pat ki trai iing ba long kum ki kmie ki kpa ia kiba sah wai ha ki iing jongki, ki sneng ki pyni haba leh bakla ki khynnah ba sah wai ha ki iing jong ki bad katno ka pynkmen mynsiem iangi ban iohi ba ki don ki trai iing ba sbun ba iarap lem ia ki khynnah ban sngew kum haiing haba ki don jngai na la iing.
2. Ka jingkyrduh um ha ki jaka Shongwai:
Kane ka dei kawei ka jingeh ba jarjar ba ki nongshongwai ki iakynduh barabor. Ka ktah ia ka por khreh kot khamtam ia ki khynnah skul kiba hap ban beh ia ka por leit skul. Ymtang katta ki khynnah khunlung ki hap ban rah um ha ki borti ba khia ha ka rta ba dang rit bad kane ka jingrah khia ha ki kti ka ktah bha ia ka koit ka khiah jong ki khynnah ba dang san. Hato ki nongai wai ki la ju pyrkhat mo ban pynbiang ka umbam umdih ia ki khynnah sahwai ha ki kamra ba ki aiwai ba kin sah? Tengteng nga isynei bha ba ki don ki khynnah skul ki bymlah ban siew bai wai ha ka por kaba biang ki lah shah peit khmat bad lah shah kren ha ki trai iing, katba haba ki trai kim lah ban pynbiang um manlaki por ki khynnah skul ki hap shu kbum namar tang lah dawa ia ka hok lah shah pynmih iing. Hato ka sorkar jylla ka la ju peit mo ia kane ka jingeh ba ki khynnah skul ki iakynduh? Lah dei ba ka sorkar kan buh kyndon ym tang ia ki nongshong wai hynrei ruh ia ki trai iing kiba aiwai iing sha kiwei ba ki dei ban pynbiiang um ym kum ha ki kor sorkari hynrei ban pynbiang um ha man la ki kamra ba ki aiwai. Ka sorkar ka dei ruh ban peit ban khmih bha ia ki dor ba buh da ki trai iing khamtam kiba shim kabu ha ka dor ba heh hynrei ki bympynbiang um pat ia ki nongshongwai khnang ba kan ym ktah ia ka por jong ki khynnah skul. Ka por ka lah poi ba dei ban fine ia ki trai iing kiba ai iingwai lada kim lah ban pynbiang ka umbah umdih ha poh iing ba ki ai wai.
3. Ki Painkhana ha ki iingshongwai:
Ban peit ia ki painkhana ba ki trai ki phah pyndonkam ia ki nongshongwai jongki phin da i sangsot shisha. Ki don ki trai iing kiba khwan myntoi bha ialade tang ban ioh lum kynshew pisa shalade khlem pyrkhat lem pat ia ka koit ka khiah ki jingdonkam ba kyrkieh haba jia ka pang kpoh ka pang pynhiar ia ki nongshongwai. I sangsot ban peit ba ki nongshongwai ki hap ban ap lain mynstep ban ioh pyntylli ia ka kpoh. Lada don kiba lah rung shwa ha painkhana kiba kham shim por lah hap ban pyrta ba kin kham kloi lem, balei? namar ki trai kim pynbiang painkhana ia ki nongsahwai. Ki don ki trai kiba phah pyndonkam ia kawei ka kamra painkhana na ka bynta 3-4 kynrad. Kawei ka painkhana na ka bynta ki lai saw long iing? La eh ban pyrkhat ia ka jingshim kabu ki trai iing khasi jongngi shisha kiba shim kabu ia ka jinglong luilui ki nongkyndong. Ki trai iing mynta ki dei ruh ban pynbiang painkhana ha poh ki iing ki sem ym shuh kum ki painkhana ba don shabar iing kum ha ki juk hyndai. Namar ka juk hyndai ka juk ba dang hok ka pyrthei ka dang don jingshngain ka leit bar shabar iing mynmiet myniong. Kum ha kane ka juk sniew pat ym ilong shuh ban buh painkhana shabar ban pyndonkam ha ka por miet por iong kam shngain shuh. Ban lait na ka tyrut ka smer ki trai ki dei ban pynbiang ymtang ka um hynrei wat ia ka painkhana ruh ha ki kamra iing ba ki aiwai. Pyrkhat bha maphi ki trai ialade phi buh Painkhana hapoh iing bad phin sngew kumno lada ki khun jongphi ki leit shabar mynmiet myniong? Khlem artatien phin tieng phin syier. Kumta sngewbha pyrkhat lem na ka bynta ki para briew ba iasah wai ha ki iing jongphi ruh.
4. Ka jingbymdon ki kamra khlieng bad kamra sum kiba biang:
Lada phin leit jurip ha ki jaka shongwai phin lap ba ka jaka sait tiar bad jaka sum ki dei hajuh. Katba lada phi leit peit ia ki trai iing pat phin lap ba ki da don ki jaka sait tiar bad jaka sum la ka jong. Ka jingkylli ka long balei ba kam long ia ki trai ban sum bad ban khlieng hajuh bad balei ba ka long ban sum bad ban khlieng hajuh na ka bynta kiba sahwai? Hato kane kam dei ka jingibein ia ki rit ki ria? Leit sha kiwei ki jylla jong ka ri India seh phin peit kumno ba ki trai ki pynbiang ia ki nongshongwai khlem da peit shiliang ba ki dei ki khynnah skul ne ki ba lah trei. Kam pher lada ki ai wai tang shi kamra ruh ki da don ki painkhana ka um hapoh iing bad ki jaka khlieng la ka jong.
Lyngba kane ka jingthoh nga kwah ban pynkynmaw iaphi ki parari katno ka long kaba sngewtynnad ban iohi ba phi iohkam iohjam bad ioh kamai lyngba ki iingwai kiba phi don kiba U Blei u la kyrkhu iaphi hynrei phi dei ruh ban sngewthuh ba ki por ba mynshwa bad ki por ba mynta ki lah iapher baklybak, kumta kumba phi update ia ki Iphone/Smart phone/ Screen Tv/Computer etc kumta nga kyrpad ruh ba phin kynmaw ban update ia ki kamra aiwai jongphi ruh kat kum ka jingiaid ka por khnang ba kan wan rah ia ka koit ka khiah ka shongshngain ha ka miet ka iong na ka bynta ki khun Khasi jongngi hi.
Angel Mac
|