Shillong: Ka Shillong Lajong FC kan iakhun pyrshah ia ka lahduh ka I-League mynshem snem ka Minerva Punjab FC lashai ka sngi ha JN Stadium ha Shillong por 5 PM.
Ka tiket lah ban ioh na The Mobile Centre Khyndai Lad bad na Counter ka SSA ha Polo.
Ha ki jingialehkai lai tylli shabar na la iing, ka Lajong ka la shah pynliem lut ploin bad ka la jop tang shisien ha ka jingialehkai ha la iing bad ka rem shisien ha la iing.
Ka la shah rem ha ka Indian Arrows, Gokulam Kerala bad ka Churchill Brothers Goa shabar na la iing bad ha la iing ka la shah rem ha ka East Bengal bad ka la jop tang shisien ia ka Aizawl ha ka iing.
Ha kane ka kynti, ka Lajong ka la sei bad iasoi tang ia ki nongialehkai na ka ri bad kiba bun ki dei na kane ka thain mihngi hi khlem da wanrah nongialehkai nabar ri kumba long ha ki snem ba la dep hapoh ka jingialam u coach u bah Alison Kharsyntiew.
Hapdeng kine ki jingshah rem, u coach u bah Alison um shym la kubur ba ka dei ka jingbym biang ki nongialehkai hynrei u la ai daw ba ka dei na ka jingbakla.
“Nga sngew hun iaka jingialehkai ki khynnah jong nga ha kiba la dep hynrei ki don ki jingbakla ka jingshah rem jong ngi khamtam ha ka rukom ap dien”, la ong u coach u bah Alison.
Halor ka jingduna ka bor met bad ka rynieng bad ki nongialehkai nabar ri haba ianujor bad ki khynnah na kane ka thain, u bah Alison u la ong, “Ia kata, ngi dei ban long kiba sted ha ka rukom ialehkai, namar katba ngi dang suki kan pynioh kabu ia ki nongialehkai ba kham jrong”.
Ha kawei ka liang, u kapten u Samuel Lalmuanpuia u la ong ba ka klob, u la kyntait ba ka kynhun ka tlot hynrei u la ong ba ha kaba iadei bad ka aiom ba la dep, ba don lang ki nongialehkai bar ri, kane ka kynhun kaba mynta ka kham biang hynrei kaba donkam ka long ban ialehkai kham satar.
“Ki sing kim ju thiah, ha kano ma ka por kin khie thiah. Kumba long kiwei ki klob, ngin khie khlieh biang bad kane kan long ha kane ka sngi Thohdieng. Ngi donkam ban khur lai point na kane ka jingialehkai lashai ka sngi”, la ong u kapten ka Lajong.
Ha kawei ka liang, ka Minerva Punjab ka la pynliem dang shen ia ka Aizawl FC da 2-1, ka iakhaid ia ka Churchill Brothers 0-0 bad ka shah rem ha ka Real Kashmir FC da 1-0.
U coach ka Minerva u Paul Munster u la ong ba kum ka lahduh kam donkam ban sdang, bad ka donkam ban sdang naduh bas dang.
“Kum ka kynhun lahduh, ngi donkam ban sdang naduh ba sdang. Ka jingialehkai sdang kam dei kumba ngi kwah bad ka jingjop ka dei kaba donkam”, u la ong.
U Munster u la ong ba ka itynnad bha ia ka rukom ialehkai ki nongialehkai ka Lajong haba peit ha TV. “Ki don ki nongialehkai na ka jylla, kiba ialehkai da ka jingthrang bad jingangnud ban lehkai bha. Ka dei kaba sngew tynnad ban iohi ia kane ka jingialehkai kaba ka klob kaba la ialehkai tang da ki nongialehkai na iing lajong”.