Aizawl: U President ka NPP, U Conrad K Sangma, uba dei ruh u myntri rangbah ka Jylla, ula leit ban pynlong jingialang paidbah ha Vairengte bad ha Kolasib, na ka bynta ki kandidet jong ka seng NPP ha ka Jylla Mizoram.
U Conrad, u wer ia ki paidbah, ba kin kyrshan ia U Hmingchungnunga bad U John Lalremruata, kiba dei ki kandidet, kiba iakhun na Serlui bad na Kolasib constituency.
U Conrad Sangma lem bad ki nongialam NPP ha kawei na ki jingialang rud surok:Saidul Khan
Ha katei ka jingleit jongu sha Serlui Constituency, ula ia kynduh ia ki paidbah ha kiba bun ki jaka, ha kaba la synran da U Dr. Lalrintlunga Jahau, National Secretary jong ka NPP, uba peit ia ka Mizoram bad U Sashank Gataraj General Secretary ka NPP ba peit ia ka Nagaland.
Haba kren ha ki jingialang, U Conrad, u ong ba ka dei tang ka NPP, kaba dei ka seng, kaba pyrkhat ia ki rit paid bad ia ki Khristan.
“Ngi dei ka seng jong ki rit paid bad ngi trei shitom ban pynneh ia ka jinglong kyrpang jongngi bad ba ngin dei ka sur jong ka dong shatei lam mihngi” ula ong shuh shuh. U Conrad, ula ong shuh shuh, ba ka dei ka jingsdang ha ka rukom kaba rit ha Mizoram.
“Nga jied ban iaid na surok, ban tip kham bha ia ka jinglong jingman jong kane ka thain. Ym dei kum kiwei de ki nongialam, hynrei nga te nga iaid na surok. Ka Mizoram, ka dang sahdien shibun bad ka la dei ka por ban jied noh ia ka seng jongngi ban kyntiew ia ka Jylla kham shajrong” ong U Conrad.
Ka Mizoram, ka don ia ka kad liengsuin, ha kaba lah ban leit ban wan, lyngba ka Guwahati, Kolkata bad na Delhi ruh bad lehse ka jingkren jong U Conrad, ka thew ba kiwei ki nongialam, ki wan da ka liengsuin bad kim ju iaid satia da ka surok kali.