BALEI KI BRIEW KI KRENSIH

Bah Francis Syiemlieh

Ka jingkrensih kadei ka jingkwah jong ki briew ne ka jingmlien jongki ban pyndonkam da ki kyntien bajakhlia ne da ki kyntien bymdei rukom kiba pynmong īa ka akor babha jong ka longbriew manbriew. Kumta namarba ki long kibym īahapdur ne kiba pynmong īa ka akor ka burom jong ka longbriew manbriew, ka imlang-sahlang jong ki briew kam lah da leilei ruh ban pdiang īa ki jingkrensih krensang kum ki jingleh ne ki jingkren babha bad kiba dei-rukom. Da kane ngi sngewthuh shai ba, namarba ka jingkrensih krensang kam dei ka jingkren ne ka jingleh badei rukom, kam dei ban īohjaka ha ka grammar jong ka kren ka khana lane ha ka surkren jong ka shyntur ne ha ka thoh ka shon, lada kata ka jingīakren-īakhana ne ka thoh ka shon ka thmu beit tang sha kaban īakrensih-krensang sadhai. Halor jong kane kajuh ka nongrim, ka jingpynshitom kaba katkum ka aiñ (legal punishment) kadei ban bud īa kito kiba krensih krensang la kalong ha kano kano ka rukom ne ha kano kano kapor ne ha kano kano ka jaka ruh!

Ban bynrap shuh īa kane tang khyndiat, ka grammar jong kano kano ka jaitbynriew kaba pdiang īa ka jingkrensih bad īa ka jingkren khlemakor kum ki jingkren ne kum ki rukom-thoh badei bad babiang, kadei ka jait grammar kaba pyni īalade ba kadon jingduna ne jingpangtlot (drawback, inadequacy) haei re haei bad na kino kino kidaw, bad ka ktien Khasi ne ka grammar Khasi kadei kawei na kita ki nuksa kaba pyni īalade ba kadon jingtlot jingdkoh ne jingbymbit bymbiang. Shuhshuh, khlem da donkam ban da batai, phi lap-hi dalade ruh īa kine ki jingtlot jingdkoh (bad ruh, īa ki jingsngewlong lyngkhum kiba laiphewjait) kiba don ha ka grammar khasi, hana ba lada yn ong īa u Blei da u “Me” ha ka 2^nd Person jong ki personal Pronoun hana ka kadei ka jingainam aibruom īa u Blei ba udei u bakhraw, hynrei kane kadei kaba bakla ne kaba kynriang kum ka dustur Khasi hi. Kumno kalah ban long kaba deidor bad kaba dei-akor ba īa Uta uba ngi tiengburom eh, īa Uta hi ngin ong da u “Me?” Kum ka nuksa: Ngi ju ong īa u Blei “Ah Blei u badap da ka jingieit bad uba donbor tam, ‘ME’ long u bakhraw.” Ngi ong te ngi ong īa u Blei ba udei uba dap da ka jingieit bad uba donbor tam, hynrei ngi ong ruh Īa-u “ME.” Hato ki Khasi ki ieit bad ki burom seh īa u Blei? Hato Kane kam mut ba mangi ki Khasi ngi dei kita ki briew kiba sngewthuh klumar īa ka akor ka burom lane ba ngi dei kiba khlemakor naduh na ka dustur tynrai lajong hi? Da kane lah ban ong ba 95% (percent) na ki Khasi kim ju ong īa u Blei ‘Ah Blei u badap da ka jingieit bad uba donbor tam, PHI long uba khraw.’ Hato kam dei kumta? Ha kajuh ka rukom ruh ki Khasi ki ong īa ki angel bad īa ki riewkhuid jong u Blei ha Bneng da ki “me” bad da ki “pha.” Kane kam dei kaba mih na rukom sngewthuh akor babha jong ki Khasi. Hato ki Kristan-Khasi ne ki Katholik-Khasi kim ju ong-tohmet īa ka Maria Theisotti “Khublei ko Maria…..u Trai udon bad PHA…..la kyrkhu IAPHA napdeng kynthei bad la kyrkhu ia u soh ka kpoh JONGPHA u Jisu….?” Hato kane kam dei ka jingkrensih krensang ne ka jingkren bakhlemakor īa u Blei bad īa ki angel bad ki riewkhuid Jong-u? Hato u Blei u sngewbha īa ka dustur Khasi bad īa ka Ktien ne Grammar Khasi? Katno leilei ki Khasi kin krensih īala ki para-briew bad īala ki para-jynthaw!

Ka jingkrensih krensang kadei kawei na ki jingkren ne ki jingleh jong ki briew kaba pynmong bad kaba pynsngewsih jur īala ki para-briew, hynrei kito kiba ju mlien ban krensih pat īohi kumba kim sngewpher ne kim sngewjakhlia eiei īala kajong ka jingkrensih pathar. Nalor kata ruh kitip bha īa kato ka jingong kaba ong “Ka ktien kadei kaba thiang tam bad ka ktien hi ruh kadei kaba kthang tam.” Kiba kum kine ki jaitbriew ki pynlong ktien-bha īa ki ktiensih ktiensang bad ki pynlong ktiensih ktiensang pat īa ki ktien-bha, thik kumba ka long ha ka ktien Pnar ne Synteng kaba ong “Ka Bei, u Pa; i ait.” Ha ka jingshisha kane ka ladei ban long kumne: ‘I Bei, i Pa; ka ait’ ban pyni ba ki kmie ki kpa kim long ki bapoh.

Ki briew kilah dang stad bad kilah dang pawnam. Imat ka jingkrensih ruh kalah dang kiewkyrdan lang bad ka jingstad bad ka jingpawnam jongki, hynrei imat ymdon kiba shim khia īa kane. Ngi īohi ha Ki Reality Show ne ki TV programme jong ka American Idol bad ha kiwei kiwei ki TV programme, haba ki judge ne ki nongbishar jong kine ki reality show ne ki TV programme ki ong īa ki nongīashimbynta ‘sexy’ (kaba mut ‘ibang ne iskuiñ kynshleiñ’) ne ‘wicked’ (kaba mut ‘bymman’), ka pyni ba kita ki nongīashimbynta kidon īa ka jingkyrmen ba kin poi shaduh sha kliarduh jong ka jingīakob ne wat ban jop syndon īa ka thong ruh. Kita kijuh ki judge ne ki nongbishar pat kim ju idon jingsngew kitpop eiei haba ki ong “sexy” ne “wicked” bad da kumwei kumwei. Ha kajuh ka rukom kita ki nongīashimbynta ne ki nongīapyni sap-pyni phong pat ki da sngewsarong hi uiñ ne ki da sngew hieng khmut hi huiñ haba ki shah ong “sexy” ne “wicked.” Hangne phi lah ban kylli balei kitei ki nongbishar ne ki judge ki pyndonkam da ki ktiensih ktiensang ban īaroh ne ban kyntiewnam īa kita ki nongīaleh īakob ne ki competitors kiba pynshoh jingmut īaki? Kadaw kalong ba kim sngewdap ne kim sngewsule shuh ban dang pyndonkam tang da ki kyntien babha bad basngewdonburom kum da kaba ong “ish itynnat” (beautiful, wonderful, awesome) ne “phi la leh bha” (great, excellent, marvelous, epic, history) bad kumta terter. Kumta ngi sngewthuh ba ka jingkrensih krensang kadon ruh haka īa ka jinglong kaba lah ban pynbrai ne ban pynshrai īa ki nongkrensih ban krensih krensang. Hynrei ngi tip pat ba ki ktiensih ktiensang ki pyntatdor īa ka longbriew manbriew bad ka pynhiardor ka jaitbynriew!

Ka jingkylla mrad noh jong ki briew kiba lastad bad kiba lapawnam kala dang buh īa ka imlang-sahlang jong ka pyrthei ha u pud jong ka jingumdum bashyrkhei, namar kala sohsat haduh katta katta ban pyrkhat kumno ban pynsngewthuh biang ne ban pynngeit pat īa ki briew ‘kaei ka babha bad kaei ka basniew,’ namar haba ki briew kiba lastad bad kiba lapawnam ki kren ne leh īa kaei kaei kiba kynsha-kynsha bad kiba khlemakor sat. Ki paidkar ne paidbhur pat ki bud ne ki pynbud īaki la kum ki khyllung kiba dang shah hikai hala ki kmie ki kpa lajong kumno ban dih bha īa ka dud (ka dud jong ka jingbymman); bad ynda haba ki lanang ban lehsniew hi ne ban krensih-krensniew hi pat ki kren bad ki leh īa kata da ka jingshongshit la kum ki riewlamwir kibym tieng shuh īano īano ne īa kaei kaei ruh.

Kitei kiei kiei ki pyni ba katba ki briew kidang īamilai lang ne īakyllum lang bad kito kiwei pat ki briew kiba ju mlien ban īakrensih-krensang, ka jingsngewthuh jongki shaphang jong ka jingsniew jong ka jingīakrensih krensang ruh kylla long myllen lang noh, kat haduh ban da sngewpohjait. Kaba bud īa kane pat kalong ba kita ki briew kim salia shuh ban krensih shlur-pathar khlem pyrkhat shuh īa ka burom ka akor jong kiwei kiba don ha sawdong jongki, ne jong ka imlang-sahlang. Kane kadei ka jingpynkheiñ khnang īa ka hok-tynrai jong ka akor ka burom jong ka longbriew manbriew kaba dawa jur īa ka jingshah pynshitom kaba katkum ki kyndon jong ka aiñ (lada ki aiñ kiba pyrshah īa ki ktiensih-ktiensang kidon ne kidang treikam). Kito kiwei pat ki briew kiba pyrkhat-lynga lynter shaphang jong kane, kata, kumno ban pynneh pynsah īa ka akor longbriew-manbriew babha, kidei ban dang īaipyrkhat shitom kumno ba yn leh khnang ba yn lah ban tehlakam ne ban ratdyngkhong noh īa kane ka jingīakrensih pathar namar kalong ka jingduhnong bakhraw īa ka imlang-sahlang babha bad kaba donakor donburom!

Kum ban wad īa ka daw balei ki briew ki krensih pat, lehse kam long kaba eh; hynrei kalong pat kaba bunkam namar ka pyrthei hi ha kine kisngi baijli kala jyllei da ki ktiensih ktiensang suda, khamtam haba kane ka juk HIPHOP hi ka dap bad ka shlei da ki ktiensih ktiensang suda kat sha baphai naduh na ki jingrwai shaduh sha ki whats apps bad kumta terter, bad kumba nga ladep ong mynshuwa  HIPHOP kamut “Hell is Popping Hell on People” kaba mut ‘ka dujok ka khlei ne ka bynthiew da ka dujok ha ki briew.’  Kine harum pat kidei tang katto katne tylli kidaw balei ki briew ki krensih (khamtam eh hangne ha Rikhasi batipbriew-tipblei da khongpong jongngi):

• Kidon ki briew kiba thaw, hikai, pynshlur bad pynphriang īa ki ktiensih ktiensang, kumta ki ktiensih ktiensang ki sa pur ne phriang bad ba kito kiba krensih krensang ki sa dangroi-dangroi.
• Ka Grammar Khasi kalong kaba tlot, kaba kynrum kynram, kaba pynlyngkhum jingmut jingpyrkhat bad kaba dap da ki jingumdum suda kibym lah jerkyrteng shuh. Īanga marwei hi ka Grammar Khasi ka pyntlot rynieng-rynieng bad tengteng sngew kumban kren klumar ne ban krensih noh………..!
• Ka Dustur Khasi ruh kalong kaba tlot bad kaba pyntlot jinglong babha īa ki briew bad kalong ruh kaba pynthudshen īa ki briew, wat lada ki briew (ki Khasi) kim poi-phohsniew ban puson īa kane hynrei kadon hapoh jongki; kumta ki briew kilong kiba thudshen kumba shah kynthah ding ilektrik (short circuit) kat haduh ba kin da krensih ruh. Dei hangne ba ki briew tang shu bakla ki krensih ne timsih. Ka Dustur Khasi kadei ka dustur kaba dap da ki jingshohdab-jingbha suda, kumba shu kren lyngkot. Ka shohdab īa ka akor ka burom babha bad badei bad ka sdang na kaba shohdab ne lehibeiñ īa u kpa nyngkong-nyngkong (Tangon īa u nongap langbrot bad ki langbrot kin sa sakma–Matheus 26:31). Kane ka pynbor ne ka ñiah-jubor īa ki shynrang khasi ba kin krensih bad ki sa bud-nuksa pat sa da ki khun shynrang bad da ki pyrsa shynrang (bad ki khun kynthei bad ki pyrsa kynthei ruh). Nangne pat ka sa mih ka lawei ne ka pateng jong ki briew kiba krensih lamwir, haba la saiñdur tyngeh lypa da ka dustur.
• Ka Saiñpyrkhat Niam POK-POK (‘Protestant ong Kristan-Pyrthuh ong Kumjuh’) kadei kaba pynklumar īa ka Bible, watla ka Bible kadei ka kot kaba hikai īa ka akor longbriew-manbriew badei bad babha. Kane ka pynpait, ka pynbakla bad ka pynīapher īa ka jingsngewthuh badei jong ki briew īa kiei kiei, kumta ba ka sa mih ka jingsngew “īapher” bad ba ki briew pat ki sa krensih niam ne ki sa kren klumar hala-hala ka jingsngewthuh lajong-lajong. Kum ka nuksa bakhyndiat: Katba ka Niam Kristan jong ki Khasi ka ong īa ki briew ha ka Bible da ki Petrus, ki Markus bad ki Paulus bad kiwei kiwei, ka niam POK-POK jong ki Protestant pat ka pynong īaki da ki PETROS, ki MARKOS bad ki PAULOS bad kiwei kiwei. Kane kalong kumba ka pynbor īa ki briew ban krensih wat haba kim kwah ban krensih. Kine baroh kidei shi bynta jong ka grammar ne jong ka jingkren bad jingpule badei rukom bad badonakor, hynrei lakren ne pule klumar noh. Kumno ki wanmih artylli ki rule jingkren-jingthoh ne ki grammar ha kajuh ka jaitbynriew bad ha kajuh ka jait-niam bad tang ha Rikhasi-Pnar hi? Kata ruh, ki sdang na ka Bible!
• Ki Khasi hi kidei ka jaitbynriew kaba shlei da ka jingkrensih suda. Kumno ki briew kiba thynrang ban krensih kin nym jyllei?
• Ki kmie ki kpa Khasi kidei kiba krensih īalade bad ki sneng ki kraw khun ruh da ki ktiensih ktiengsang. Kumno ki khun kin nym brai ban krensih haba ki kmie ki kpa jongki ruh kidei kiba krensih?
• Kiba lasan-larangbah jong ka imlang-sahlang jong ki Khasi kim minot shuh ban hikai īa ki khyllung khynnah īa ka akor babha ne kumno ba kin nym kren īa ki ktien bymdei, kumta ki khyllung khynnah bad ki samla ki krensih hun kat-katba ki mon.
• La shu ieh īa ki khun da ki kmie ki kpa ba kin san kum ki phlang ki kynbat harud nala jong ka lyntibah jong ka imlang-sahlang ba kin shah pynbit jingmlien ban krensih krensang katba ki mon.
• Ynda la Kynshleiñ ktien bad la kynshleiñ jinglong kiba laheh, ki sa bud pat sa da ki khynnah ban leit īakrensih mon para maki, bad kane ka jingmlien ban krensih ka sa san lang bad ka snem jong ki briew.
• Ki khynnah kila īohsngew lypa naduh dangrit īa ka jingīakrensih-krensang jong ki bahaīieng bahasem lajong kum ka kmie bad u kpa bad kiwei kiwei ki bahaiieng-hasem, ne ki para marjan marpa ruh bad ynda ki laheh ne ki lanud bad īohlad ki sa krensih lem.
• Kila mlien naduh dang rit ban kren shuwa da ki kyntien kiba īasyrīiem bad ki ktiensih, kum ka “bong” bad ka “leh” kiba katba dang īaid ka por pat ki kylla-long sha ka “bow ne bew” bad sha ka “liah” ynda ki laheh. Ki kyntiensih “bow” bad “liah” ki thew beit īa ki jingleitshabar jong ki kynthei bad jong ki shynrang.
• Ki briew ki pynshrai bad ki shah pynshrai ban krensih.
• Ki briew ki krensih namarba ha ka pyrthei la synshar da ki riewkhlemakor.
• Kim don kyntien jingkren (vocabulary) palat kiba biang bad kiba īahap ban pyndonkam, kumta ki shu kren noh da ki ktiensih ktiensang ban pynhun īalade.
• Ka jingkrensih ka pynsngewkhaiñ īa kito kiba krensih.
• Da kaba krensih, kiba krensih ki kwah ban byrngem ne ban byrthen pyntieng briew.
• Kidon ki briew kiba kheiñ tipbriew-tipblei īa ki ktiensih ktiensang kum ki ktien shnong lajong.
• Ki briew kiba krensih kidei kito kiba lehheh ne leh ‘boss’ lane kiba sngew īalade kum ki ‘boss,’ kalong kum ha kaba ki shait timsih ki heh-pulit īa ki langrut ne īa ki bahapoh lajong.
• Kiba krensih ki sngew kham-halor īalade bad ki peitpoh īa kiwei.
• Ka jingīalong paralok bad ki briew kiba heh tiensih bad kiba khlemakor ka pynroi īa ka jingīakrensih.
• Kidei ki briew kiba khor-ktien ne kiba tohmet jinglong.
• Ki nongkrensih ki sngew kham stad bad kham shlur haba ki krensih, kumta ki krensih hun.
• Kiba krensih kidei ki jaitbriew bakhlemakor bad kim burom īa kiwei.
• Kidei ki jaitbriew kiba lakha lang bad ka jinglong bakhlemakor bad bymdon mano mano ruh kiban pynbeit lem īaki katba kidang sdang ban krensih ha kipor bamynshuwa katba kidang rit ne dang shida.
• Kidei ki briew kiba wan na ki rukom shnong kiba khlemakor ktien bad kiba khlemakor jinglong,
• Ki duna īa ka akor babha jong ka ktien Sohra ne ka ktien khasi bala pdiang lut da baroh (official khasi vernacular, mother tongue)
• Ki kyntien “me” bad “pha” ruh kidei shibynta jong ka ktiensih bad kane ka sdang nyngkong eh na īieng bad na ki paramarjan bakhlemakor bad batohmet jinglong ne tohmet ktien, kaba bud sa da ka jingbym salia than jong ki kmie ki kpa ban tehlakam. Hynrei ki khasi pat ki ong ia kine kum ki ktien pynkhraw.
• Ka jingishrai ne ka jingibeiñ īa kiwei ba na madan ha madan ka pynkrensih īa kito kiba krensih (kumba long ki driver taxi bad ki khynnah thadlad); bad kumta terter.

KIWEI PAT KI DAW:

• Ki ktien khasi ha Rikhasi kidon bunjait kat shi khlawbah ki sohbyrthit bad ki diengshynraiñ balongshiah. Kawei ka shnong ka pher na kawei pat ka shnong. Ha Sohra kadei ka ktiensih ha Mylliem ne ba Nongkseh upper Shillong pat kadei ka ktien-shnong kaba bha. Ha East Khasi Hills phi kren bha, hynrei ha West Khasi Hills pat ka ladei ka ktiensih ktiensang. Ha Sohra ki ong ‘ka eit, i mei;’ ha Jowai pat ki ong ‘i ait, ka bei.’
• Balei ki briew ba lanang lastad ki krensih: Dei namarba kim don īa ka raiñ ka rem babha.
• Balei ki briew ba dangbiej ki krensih: Dei namarba ki khlem shah hikai ban sngewthuh ba ki tiensih ktiensang kidei kiba sniew bad kiba pynpohdor īa ka jinglongbriew babha.
• Balei ki khynnah bad ki khynnah samla ki krensih: Dei namarba ki kham sngew rangbah haba ki krensih.

Ka jingkrensih krensang kadei kawei na ki kam-runar ne kam-beaiñ kaba dawa īa ka jingshahkem bad īa ka jingshah pynshitom ha ka aiñ lada ka aiñ jong kata ka ri ne ki riti dustur jong kata ka jaitbynriew kilong kiba dang bha bad kiba dang īaidbeit-īaidbiang bad kiba shongblei. Nga shem ruh ba lada yn pynshitom īa ki khasi katkum ka aiñ, bun naki kin hap ban leit shong khapngiah ha patok, namar ka jaitbynriew khasi kadei kawei na ki jaitbynriew ha ka pyrthei kaba heh ‘tiensih tam. Tangba mano hi kiban kem bad kiban pynshitom īa kito ki briew kiba krensih haba wat da ki pulit hi ruh īalade kidei kiba krensih lamwir la kum kito ki ksew khlehbiej kiba lawan pass napoh dog squad.

Kynmaw ba ka ktiensih ktiensang ka pynkylla jinglong īa ki briew khala-khala (nangto hangto) na ka jinglong baīaishah sha ka jinglong bakhongkhong, ne na ka jinglong bajynjsur-mynsiem sha ka jinglong bakhoikhoi-mynsiem ne bakhuikhui-mynsiem, na ka jinglong badonburom sha ka jinglong bajahburom ne bakhlemakor, na ka jinglong bajemnud sha ka jinglong badom-bitar kum ki mradkhaw ne na ka jinglong ba kum ki briew babiang sha ka jinglong ba kum ki mrad barunar ne ki riewkhlaw bashitengkhlieh, na ka jinglong baishongkun sha ka jinglong ba-ipohdor ne basngewpohdor, bad kumta terter. Te ki ktiensih ktiensang, lada kidei kiba kumno kumno ruh, kidei kiba shongksuid-shongmrad, bad dei ban pynduh noh!