Kyntang lyngdoh ha Mawprem

Shillong, 30K’Lyngkot
Ka jingpynkyntang Lyngdoh Sohblei ia u Dikon Rimiki Niangti, u khun jong I Bah Marquis Pakyntein (bam kwai ha ïing U Blei) bad I kong Lana Niangti, kiba na Lumkshaid Shillong, kan long ha ka 2 tarik u Rym phang 2014 ha Madan Shnong, Lower Mawprem, Shillong ban sdang ia ka jinglehniam da ka Mass Kyntang Lyngdoh Sohblei ha ka por 10 baje mynstep da u Archbishop Dominic Jala, ha ryngkat ka jingsynran jong bun ki Lyngdoh Sohblei, ki nongtrei Balang bad ki paid riewngeit bad yn bud pat da ki prokram lehkmen bad ka jingkyrkhu ha ka por 1 baje shiteng noh sngi.
Na ka bynta ka jingbit jingbiang jong kane ka sngi la pyrkhat ryngkat bad u traffic Incharge ka Lumdiengjri Police Station ban ai one way ha baroh ki surok jong ka Lower Mawprem bad yn don kine ki jingpynbeit ba ia ki kali ba wan sha Lower Mawprem yn don No Entry na jingkieng Lumkshaid sha Lumkor bad na Upper Mawprem sha Kyrbom, na ka bynta ki kali ba mih na Lower Mawprem yn don No Entry na Kyrbom sha District Council bad ia ki kali kiba leit sha Bishop Falls pat yn pyniaid na Lumsohphoh.
Baroh ki bus ba wan sha ka kyntang Lyngdoh kin pynieng ha ka bynta ba shalor jong ka Parking lot ha stand jeep bad ki sumo kin pynieng ha ka mala ba shapoh, ki kali rit kin ieng sha shilliang ka surok na Kyrbom sha District Council bad ki kali ba don ia ka Car Pass kin ieng ha ki jaka ba la buh, katba ki kali jong ki Phadar bad Sister kin ieng ha Parish.
Namar ka jingkhim jong ka jaka la khang pyrshah ban pynmih ia ki dukan ba la thmu ban buh kyrpang na ka bynta katei ka sngi ha surok ne die madan ia kino kino ki jingdie bad pynwit ia ka lynti iaid. Ha kajuh ka rukom la kyrpad ban don ka jingkitkhlieh ban ym buh klumar ia ki kali bad pynthud ia ka surok khlem ka jingbthah jong ki Volunteer.
Na ka bynta ka jingbit jingbiang jong ki paidbah ka Ordination Committee ka la buh ia ki dukan ja bad sha ha ka jaka jong ka Parish ha Pdengshnong ki ban die ha ka dor ïew bad baroh ki jingbthah kiba iadei bad ki kali ne dukan kin treikam naduh mynstep haduh ka por 4 baje janmiet, ong u Bah Stenis Lyngdoh Nongkynrih Secretary Ordination Committee.