Da U Blesstanroy Lyngdoh
Tamabil: Ka jingleh sting ki shipai Border Security Force (BSF) ne kita ki shipai iada khappud, ban pyrkhing ia ka jingwanrung beain ki khar Bangladesh, kiba la wan ban tuh ban thiem bad leh ruh ia kiwei kiwei ki kam bymman ha ki shnong kiba la hap ha India, ka la pynshitom shikatdei eh ia ki paidbah bad ki nongrep na Tamabil ter ter shaduh Mutapur, kiba dei ki shnong kiba don ha khapppud ka India-Bangladesh.
Kawei na ki ktem ap pahara thylli ki shipai BSF bad ki briew na Bangladesh kiba la pynlong madan ialehkai ha u pud u sam ka India
La lap ba bun na ki paidbah kiba sah ha kitei ki shnong, kiba kynthup ia ka shnong Nongkhein, Amlympiang, Amdoh, Amsku, Rhongkum bad shaduh Mutakpur, ha kaba bun na ki paidbah kiba sah ha katei ka thain ki dei kiba im da kaba rep Kwai, Tympew lem bad kiwei kiwei ki jait jingthung, hynrei ka long pat kaba sngewsih ban iohsngew ia ka sur jong kitei ki nongrep, namar nalor ba ki la rep bad trei shitom ha ki kam rep ha ka por mynsngi, hynrei ki hap ban pynshitom ialade da kaba ap miet, tang ban lait shah tuh ia kitei ki mar rep na ki nongtuh kiba wan na ri Bangladesh.
Haba poi sha katei ka jaka, u Rupang, u la ioh ban iakren bad uwei na ki nongrep (u bym shem la kwah ban pynpaw kyrteng) bad katkum ka jingiathuh jong u, la ong ba baroh ki nongrep ha katei la thain ki iakynduh ia katei hi ka juh ka jingeh na ka jingwan pyndik ki nongtuh na Bangladesh.
Katkum ka jingbatai jongu, la sngewthuh ba ka daw hi kaba la pynshlur ia kitei ki nongtuh na Bangladesh ban wanrung beain sha India, na ka bynta ban leh ia ki kam tuh kam thiem lem bad kiwei kiwei ki kam runar, ka dei namar ka jingbym shimkhia da ka tnat shipai iada khappud (BSF), ban pyrkhing bad ban leh da kino kino ki lad ki ban pyntieng ia kitei ki nongtuh.
“Ngim lah shuh ban sngewthuh ia ka jingshlur kine ki khar na Bangladesh, ha kaba ki nud ban wanrung sha ki kper kwai kiba don hajan shnong jan thaw, yn nai iakren ia kito ki kper kiba don hajan bad ka Bangla, namar wat lada ngi ap bha ban lait na ka jingshah tuh, hynrei ki dang ioh ban tuh ia u kwai nalor dieng” ong utei u rangbah.
Ym tang ba ki tuh ia ki mar rep mar riang lem bad ki jingri jingdup, hynrei kitei ki khar Bangla, ki wan ruh ban tuh dieng bad Maw na India bad kit bak sha Bangladesh.
Ngi da snngewsih shisha, namar ia kaei kaba kitei ki khar na Bangla ki wan ban leh ia ki kam tuh kam thiem, hynrei ngi lap ba ki shipai BSF ki shu long tang ki nongpeitkai bad kim shem la leh ei ei pyrshah ia ki, kren diaw utei u rangbah.
Haba kylli, la ki ju leit ujor ne em haba don kiba kum kitei ki jingjia, u la iathuh ba ki la ngiah ban ujor namar wat haba la ujor, hynrei ki shipai BSF kim ju leh ei ei ruh em. Kumba ka long mynta lei ki BSF ki duna bha shane bad bun na ki iing ap pahara jongki, ki la jot lut bad ym ju don nongap, u la jubab.
Kane ka jingbymshimkhia ki shipai iada khappud, ka pynsyier eh iangi ki paidbah kiba sah ha khappud, namar kumba ka long mynta ka rung ka mih bad ban kam lyngba ia u pud u sam hapdeng ka India-Bangladesh ka long kaba suk bha, namar ba la duna palat ki shipai nongap pahara.
Kumba nga la iohsngew ia kaei kaba la jia ha shnong Pyrdiwah bad nga tip ruh ba ki thain khappud kim dei ki jaka kiba lah ban khein shngain, namar ki lah ban wan jia kino kino ki jingjia kiba pher ha kano kano ka por, hynrei ngan leh kumno namar ym don kiba iohi ia kane ka jingeh kaba mangi ki paidbah ngi iakynduh, u la bynrap.
Namarkata, ha ka jingiakren bad utei u rangbah la sngewthuh ba kitei ki paidbah kiba sah ha katei ka thain, kumba ka long mynta hi kim sngewhun bad sngewshngain ia ka rukom ai jingshakri da kitei ki shipai BSF kiba don ha katei ka thain.