Shah kem san ngut ki GNLA, na West Khasi Hills

Shillong, 29 K’lyngkot:
San ngut ki dkhot ka seng lehnoh ka Garo National Liberation Army (GNLA) ki la shah kem mynta, ka sngi ha ki pulit ka West Khasi hills. Ki lehnoh ki la shah kem ha ka por 11. 45 baje mynstep na shnong Dorangre ka West Khasi hills hadien ba la pynlong ia ka jingkhynra hapdeng ki pulit ba kynthup SWAT,CRPF, BSF bad ki pulit jylla. Kine ki san ngut ki dkhot ka GNLA ki long u Lasting G.Monim (22) na Rongjeng, East Garo hills , Arnesh G.Momin (20) na Chokpot South Garo hills, Bosco Momin (27) na Dorangre uba dei ruh u nongniah kali, Fedrick Rongrin (22) na Dorangre bad u Jaro S.Sangma (25) na Nengchigre, West Khasi hills district.
U SP ka West Khasi hills u Bah S Nongtnger u la ong ba kine ki san ngut ki dkhot ka GNLA ki la shah kem katba ki nang iaid da kali Bolero (ML-06 6451).
U Bah Nongtnger u la ong ba ki pulit ki la ioh kurup 2 tylli ki pistol, 2 tylli ka Magazine, 7 tylli ki kuli, 3 tylli mobile, 21 tylli ki dry cell bad ka kali la kurup noh da ki kali.
Ki pulit ki dang pynlong shuh shuh ia ka jingkhynra ban kem shuh shuh ia ki dkhot kiba thmu ban wan rieh tngen ha katei ka thain kiba sam shithi dawa pisa.