| Nongpoh: Ha kawei ka jingjia aksiden kaba la jia mynta ka janmiet ha ka por 5 baje ei ei janmiet ha surokbah NH-6 ha shnong Umbang, Ri Bhoi, Ar-ngut ki briew kiba dei na Assam, ki la khlad noh hashen, hadien ba ka Bike kaba ki shong ka la leit ban tynrah ia ka kynroh (Divider) jong ka surokbah NH-6.
Ka khubor na ki Pulit ka iathuh, ba katei ka Bike kaba don ia u Number AS 01 BC 3350, ka dei kaba thmu ban hiar sha Guahati, hynrei haba la poi sha katei ka jaka, kaba dei ruh ka jaka kaba kham long khongdong (Turning) ka la kum leit tynrah ia ka kynroh jong ka surok bad kaba la pynlong ia u Prabhakar Medhi, uba dei ruh Nongniah bad ka Subrata Pukone kiba dei na Guahati, ba kin hap ha surok bad khlad noh hashen. Ki Pulit ki la iathuh ruh, ba katkum ka jingiathuh da ki paidbah kiba sakhi ia katei ka jingjia, la ong ba ka daw kaba la pynlong ia katei ka Bike ba kan leit tynrah ia u Divider, ka dei namar ka jingniah stet kaba palat pud da u nongniah jong katei ka Bike. Shuh shuh, la iathuh ruh ba ka daw kaba la pynlong ia kitei ki arngut ba kin khlad noh hashen, ka dei namar ba kim phong ia ka jingiada khlieh (Helmet), namar baroh arngut ki la mynsaw jur na ka jingpait ka Khlieh. Ia ka met iap jong kitei ki la khlad noh ha katei ka jingjia aksiden, ki Pulit ka Ri Bhoi, ki la pynkit noh sha Nongpoh Civil Hospital. |
