Shah siat iap u Addl SP, mynsaw 5 ngut ki pulit langrut

Guwahati,28 K’lyngkot:
U Addl SP jong ka Sonitpur u Guljar Hussain, u la kyllon iap hashen katba 5 ngut kiwei pat ki pulit langrut ki la mynsaw jur hadien ka jingther kuli jong ki lehnoh ka National Democratic Front of Bodoland (NDFB) , ha Sonitpur District ka Assam, katei ka jingjia ka la jia mynta ka step ha ka por 7:15 baje eiei.
U S N Singh IG Law and Order Assam Police, haba kren sha ki nongthohkhubor, u la pyntip ba katei ka jingjia ka la jia ha ka por 7:15 baje mynstep, bad ka la jia ha ka por ba ki pulit ryngkat ka jingiatreilang bad ki shipai ki dang wan phai na ka jingkhynra ha kawei ka shnong kaba ki la ioh jingtip ba ki don ki dkhot jong katei ka seng lehnoh.
U Singh u la ong ruh ba ki lehnoh NDFB ki la ther kuli ha mar ba ki pulit ki dang don ha ki thain Batasipur , bad ha ka sien ther kaba ar ki la ther beit beiti sha ka kali ba shong u Addl SP , uba la kyllon iap hashen bad 5 ngut ki pulit langrut ki la mynsaw. Ka tyllong khubor ka la iathuh ba 2 ngut na kitei ki pulit ba la mynsaw ki dang don ha Civil Hospital kaba don ha Tezpur katba ki lain gut pat ki don ha Guwahati Medical College and Hospital (GMCH).