Ka iew ban iasyllok hapdeng ki nongrep bad ki saiantis

Shillong, 28 K’lyngkot:
Ia ka iew ban ai jinghikai bad ban iasyllok halor ka rep ka riang hapdeng ki nongrep bad ki saiantis, la plie paidbah hynnin ka sngi da u Additional Chief Secretary ka jylla u Bah P Barkos O Warjri hynne ka sngi ha Regulated Market ki nongrep ha San Mer.
Haba kren ha kane ka iew kaba la wan iashim bynta da 1000 ngut ki nongrep na kylleng ka jaka jong ka East Khasi Hills, ka West Khasi bad Jaintia Hills, u Bah Warjri u la ong ba kane ka iew kan long kumno ban ai jingbatai bad jinghikai iaphi ki nongrep.
“Kane ka iew ka long kum ka jingiaphylliew jingmut hapdeng ki nongrep bad ki ophisar ka rep ka riang”, la ong u Bah Warjri, bad bynrap, phi ki nongrep phim dei tang ban ioh hynrei phi dei ruh ban ai lem ban iasam ia ka jinghikai khnang ba kan roi”.
Lyngba ka jingiasam iatreilang ngi lah ban kyntiew ia ka ioh ka kot bad kan pynbha ia ka rukom rep, la ong u Bah Warjri.
Ha kane ka sngi, la don ruh ki nongkren kiba pynpaw ba donkam ban don ka skul ki nongrep ban tip shaphang ki jingpang jong ki jingthung bad ban wad ia ki lad ki lynti ban iada ia ki.
U DC ka East Khasi Hills ruh u Sanjay Goyal u la kren ha kane ka sngi uba la ban ia ka jingdonkam ban pynleit jingmut ia ka rep ka riang bad ban pyndonkam ia ki skhim ba ka sorkar ka la ai sha ki shnong bad ki nongrep. “Ka skhim MGNREGS ka dei kaba biang eh ba ka shnong kan shim ia ki lad lynti ban pynbha ia ka rep ka riang ha ki shnong bad ki thain”, la ai jingmut u DC.
La ioh ruh ia ka jingkren na ka director ka tnad ka rep ka riang ka Kong Dorothy Syiemiong, bad na kiwei ki heh ki hain. Ia kane ka iew la pynlong da ka Krishi Vigyan Kendra ka East Khasi Hills ryngkat ka jingiatreilang bad ka Agriculture Technology Management Agency (ATMA), bad ka Central Potato Reserch Institute, Shimla.